全國政協主席賈慶林聽日率領一個700人代表團來訪，話出席CEPA三周年嘅慶典。雖然今次係佢第一次來港，但係星期四就急急腳走人，連留多兩日喺度同港人一齊慶回歸九周年都唔制，莫非煲呔真係怕賈主席見到陳太上街？
其實賈主席都好痛苦，皆因佢唔多願意呢個時候來港，聽講與早年轟動中外嘅福建「遠華案」有關。身在加拿大嘅遠華案主腦賴昌星，近期就引渡回國鬧得沸沸揚揚，佢仲話想嚟香港受審㖭。
八方聽聞，賈主席訪港期間會好低調，避免與傳媒近距離接觸，怕班記者唔熟性問起呢單嘢，因為話晒賴昌星當年喺福建「發迹」時，賈慶林係貴為福建第一把手。
當然遠華案發生之時，賈已調任北京市，不過有傳媒報道過賈氏夫婦與賴關係密切，更有人曾問身在加國嘅賴昌星，認唔認識賈慶林，佢好叻咁話：「賈書記應該認識我，因為我當時係福建最紅嘅商人。」
傳真︰2623-9278
電郵︰[email protected]