近期球壇最大新聞除咗世界盃外，相信就係意大利嘅假波醜聞。意大利檢察官正式起訴意甲4間球會，包括祖雲達斯同AC米蘭兩大班霸，對13個來自呢4間球會嘅意大利國腳，真係冇影響就係假。
小弟當然知道乜嘢叫「司法獨立」，不過意大利司法機關喺呢個非常時期咁做，真係唔係幾好。𠵱家嗰13個國腳喺德國幫國家打生打死，但回國隨時失業，心情肯定受打擊，特別嚟到淘汰賽階段，真係場場硬仗，成語都有話「網開一面」，意大利司法機關係唔係應該打完世界盃先開審呢？
撇開假波因素，意大利今仗對澳洲讓到一球，真係多得滯，話就話意大利兩次喺分組賽淨勝對手兩球，不過都係對手散晒先勉強入多粒。意大利始終係意大利，領先1球永遠都會先諗住守埋佢，讓一球買上盤好似望走盤咁。
澳洲第1次打入次圈，其實唔應該過份高估，不過呢班袋鼠兵鬥志真係頑強，分組賽反勝日本，對克羅地亞兩度落後又可以追和；更重要係有個「神奇教練」軒迪克，上屆世界盃16強，軒迪克就帶住南韓，90分鐘迫和意大利1:1，加時仲憑「黃金入球」贏埋，信軒迪克嘅話，就追多次下盤啦。
瑞士「細」過關膽穩陣
同日另1場瑞士對烏克蘭，戲碼平平，不過尚算好賭，瑞士係分組賽唯一未失過波嘅球隊，雖然對手法國、南韓等攻力平平，不過瑞士防守力真係畀人有信心，烏克蘭前線單靠舒夫真高，禾路連腳風差到極，瑞士有力再延續「0」失球紀錄。
瑞士入球「細」雖然只得1.48倍，不過做過關膽都唔錯。
文：牽牛