MP3機我都換過唔少，iPod、韓國機都玩過幾部，到最後我都係鎖定呢部G3！
第一樣鍾意佢用AA電，補充方便，同款「電池機」中佢算係較細部兼靚仔！不過更重要係我貪佢夠靚聲，甚麼AAC、MP3、WMA格式我都試過，但呢部G3對應嘅ogg格式，當行最高音質499kbps，靚聲程度直逼原裝CD，呢個亦係我最Like佢原因！
要玩靚聲，記憶容量要用高啲嘅2GB，以平均一首歌14MB計算，大概入到140首左右，所以都要成日錄歌㗎！呢部機最特別係有「預錄收音機」功能，最好就係開着佢錄啲深宵電台節目第朝聽！
耳筒方面，原裝嗰個早就唔知飛咗去邊！精選推介係SONY隻MDR-NE2，低音表現超正！最重要係佢掛頸繩同耳筒二合一設計靚仔又方便，而且「耳塞」設計唔頂耳時又勾得實，以$145價錢，好抵玩！
至於G3機價！我大半年前入貨價要$2,000幾，最近行場見到賣$1,400咋，真嘔血！
記者、攝影：朱崇德
