意大利上場對住少踢1個人嘅捷克，明顯佔盡上風。不過意大利已經畀晒面，下半場冇刻意進攻，最終2:0擊敗對手，以小組首名出線。
睇過意大利喺分組賽嘅表現，前中後三路相當平均，3場波攻入5球只失1球。今場只要保持水準，贏波絕對唔係問題。
澳洲後防甩漏多
相反，澳洲喺分組賽嘅表現只屬一般，攻力都算唔錯，不過後防就錯漏百出，3場波當中已經失左5球，仲係場場都有失球。如果唔係有神奇教練軒迪克領軍，以澳洲嘅整體實力，又點可以晉身16強。可惜今場對住實力強勁嘅意大利，輸波出局都唔好問點解！一於穩陣至上，揀主客和嘅主勝。
另一場推介係瑞士對烏克蘭。瑞士喺今屆決賽周嘅表現，確實令人刮目相看。3戰錄得2勝1和，力壓小組最強嘅法國，以首名晉身16強。
瑞士表現穩定
睇番瑞士原來係32支球隊之中，唯一1支仲未有失球嘅球隊，真係講都冇人信。相反烏克蘭嘅表現就未如理想，上場對住突尼西亞，都要靠1球12碼先贏到波。就算大勝沙地阿拉伯4:0嗰場，都唔係踢得幾好，只不過係沙地踢得差。喺咁嘅情況之下，我寧願信演出平穩嘅瑞士，揀讓球主勝。
陳樹鵬（阿鵬）
有線球彩台主持
電郵：[email protected]