第一上海（227）現價無論用邊個瓣數去秤，都抵搞。最新NAV1.13元，現價（0.67元）相對折讓近41%，係折讓最大嘅證券股之一。再講，「北水南調」落實，第一上海本身又有強勢中資背景，旗下證券業應該肥仔，相對同業，可以有高少少溢價先係。而同樣係中資背景嘅申銀萬國（218），NAV折讓都講緊35%，炒NAV折讓，第一上海已經有權追落後。
又第一上海去年出售好孩子及上海張江高科技園物業，估計集團淨現金會去到6億銀，每股淨現金講緊高達0.5元，係現價75%，現金夠厚，能攻能守。而隨住上邊所出售資產收益入賬，估計第一上海06年度（12月止）純利1.75億銀，PE不過4.5倍，好吸引。第一上海試番50日線0.75元，到時，06年度預期PE亦不過5字頭，NAV折讓先至追番上申銀嘅水位。
光國有國策扶持
光大國際（257）呢期搞環保業，既係國策受惠股，又唔受宏調影響，但最近兩個月，跟住其他中資股倒水，最高累積近40%跌幅，跌得離譜。但要咁睇，光國跌到現水位，現價（0.55元）P/B只係1倍多少少，預期07年度（12月止）PE得番個位數，相對同儕20倍樓上預期PE、兩倍P/B，光國仲抵買。又呢期一樣有國策扶持嘅農業股勁彈，估計下一波輪到環保股。咪講長遠，光國彈番上4月0.66元配股價，已經有魚有肉。
錢雋