「我一向好鍾意着布鞋，尤其係呢個牌子，我就最鍾意，因為佢比一般布鞋多好多details，好似我呢對就有好多透氣位，比起一般嗰啲舒服得多，而側邊又用上銀色，一對鞋有鴛鴦色，睇上嚟特別好多，唔同一般布鞋咁單調同普通。」
黃貫中專一之士
「咁多年我都係最鍾意着Nike嘅AirForceI鞋款，就算以前冇贊助，自己都會買，淨係呢個款我都有成差唔多20對，平日着衫我都係以牛仔褲為主，所以買鞋都會以波鞋為主，冇理由着牛仔褲襯皮鞋㗎。我買鞋好多時都係興之所至，見到靚就買，但係我就唔會追款。」
Dino真皮舒服
「呢款波鞋嘅設計係畀喺室內運動場着嘅，最適合就係用嚟踢足球，呢對鞋真係好舒服，而且佢唔係膠質地，而係用真皮做，我就最鍾意着皮，特別係意大利皮就最好，因為嗰啲皮又薄又透氣，就算夏天着都唔會覺得焗，直頭係愈着愈舒服。」
蔡一傑易襯尖靴
「呢對靴我喺日本買，平時我都好鍾意着靴，但係只係着尖頭靴咋，我唔鍾意圓頭嘅。尖頭靴個形好啲，襯西褲又得，着牛仔褲又襯到。我覺得靴除咗靚之外，都好實用。因為平時我哋跳舞表演時，對鞋可以包住全隻腳，又可以包住個腳踭同腳腕，保護強好多，實唔易拗柴，我屋企都儲咗好多對。」
採訪、攝影：駱華齡、王連連、藍文浩、陳順禎
