余慕蓮，人稱魚毛，浮沉在無綫這個大魚缸裏37年，游弋於色彩斑斕的大魚群中，跟女主角一位沾不上邊。演活無數醜婦角色，魚毛堅稱自己只是演好角色，還說：「我又唔係掹雞痘皮，邊算醜呀！」年前以美女姿態拍住名模Rosemary行騷，魚毛笑言在鎂光燈下享受觀眾報以熱烈掌聲，那份滿足感，堪稱近年最得戚之作。 撰文﹕卓美娟
俗語有云「女為悅己者容」，相信每一位女性都愛在人前展示自己最美一面。余慕蓮（魚毛）在娛樂圈37個年頭，演盡無數嚇人兼惹笑的醜婦角色，她的名字已等同醜女代號。
售貨員變身小演員
服務無綫30多年的魚毛，表示有意待明年3月合約屆滿時退休，問她的真實年齡時，魚毛只含糊地說了句：「60幾囉！」
魚毛的母親鄧美美，是40年代至60年代粵語片著名二線女星，也許是遺傳了母親的演藝細胞，魚毛尚未加入娛樂圈已經醉心演藝工作。
魚毛說：「未入行之前，我係喺百貨公司做售貨員，工餘時間就參加話劇團，69年無綫透過劇團搵我以特約形式做一個時事節目《報曉雅集》，每星期一集、liveshow形式嘅晨早節目，嗰時已經做緊幕後嘅添哥（無綫監製李添勝）客串做我老公。我份正職月薪300蚊，每個show嘅人工就有50蚊，即係一個月賺多200蚊，已經好開心喇。」
做醜女好過冇對白
要魚毛自評自己是美還是醜時，她想了一會，以其含羞答答的招牌笑容說：「普通啦！我又唔係掹雞痘皮，邊算醜呀！只不過我忠於角色，毫不保留去做好個角色，最緊要個角色有對白、有發揮，咁就好有滿足感喇。雖然成日做埋啲小角，都慶幸有人記得我，淨係做啲過吓鏡嘅大企業家（行內術語指沒有對白的閒角）邊有癮㗎！」
問魚毛可介意自己被等同是醜女嗎？她說：「咁我都知我余慕蓮呢個名係等如醜女，好似啲唔靚嘅女仔參加選美，啲人都會以『仲醜過余慕蓮』嚟形容，我唔介意嘅。」
提起最得戚之作，魚毛笑言是年前獲著名時裝設計師鄧達智邀請，在時裝展中擔任模特兒，更以壓軸姿態出場。魚毛忍不住再展示其招牌笑容說：「幾十歲仲有得行catwalk，仲要係拍住Rosemary呢啲名模行嘅大騷，一出場閃光燈係咁閃，現場觀眾又拍晒手，喺現場感受到嘅熱烈反應，係拍戲冇嘅！」
旺角置業當姑婆屋
至今仍是獨身的魚毛，表示年輕時不乏追求者，可惜她無膽入情關。魚毛說：「一來可能覺得對方唔啱我，二來阿爸、阿媽喺我5歲嗰陣就分開，我都驚做受傷的女人。好耐之前已經諗到目標係買間姑婆屋，80年代初電影市道好咪日拍夜拍，終於喺84年用29萬幾喺旺角買間細細間嘅屋畀自己，貪呢區拍嘢拍到半夜都咁多人同埋乜都有得食，我份人好怕黑㗎！」
