鄭嘉穎近來忙得透不過氣，既要趕劇，又要出席活動，但仍被雜誌指他跟周麗淇拍拖，在對方香閨樓下因遇見記者棄車而逃，搭的士避記者，還起題指他窮風流，問他是否跟周麗淇拍拖，他斬釘截鐵說：「唔係。」
Fans幻想太多
「我唔明點解大家對我同佢咁敏感，好奇怪我哋做情侶咁受落，我同佢合作過兩部劇《翡翠戀曲》同《天幕下的戀人》，成績幾好，所以外界都聯想我哋係一對，之前我做佢音樂會嘅嘉賓，連佢啲fans都好鍾意我，好想我哋會戲假情真。但現實還現實，fantasy還fantasy，我同周小姐sofar只係好拍檔，就算𠵱家碰上一個有好感嘅，都冇時間諗，有時間都係要瞓一覺先。」
不過對於被指窮風流，鄭嘉穎感到不悅，「我係窮，但窮唔可以風流咩，同埋乜嘢叫風流先？又唔係影到我一個攬幾個，就算影到我攬一個都唔可以叫風流啦，我都30幾歲人，又係單身，唔可以拍拖咩，只係未遇到啫。」
曾經問過鄭嘉穎，為何不揀圈中人作伴侶，他只說：「只係想搵一個合眼緣，相處得舒服，不過最好真係唔好係圈中人啦，因為……總之就唔想啦。」是否成了驚弓之鳥還是未知數，相信在鄭嘉穎的心底只有一句說話：「請勿在我的傷口上撒鹽。」
