陳慧琳（Kelly）同飾物都算結下不解緣，佢爹哋陳崇偉喺中環開珠寶店，Kelly本身又係金至尊珠寶首飾店代言人，所以對女人飾物真係有認識，並唔係浪得虛名。
早幾日下晝五點幾，關仁撞見Kelly同女助手出現中環IFC商場連卡佛百貨公司睇首飾，當時佢着住紅背心襯白色窄身褲，打扮到鬼火咁靚，喺首飾部細意睇緊新款手鏈同頸鏈，現場見佢眼仔睩睩，一邊玩手指、一邊留意飾物設計，但奇就奇在佢都唔使將啲首飾放上手，好似一眼就能夠睇通睇透，相信呢啲就係所謂「行家一出手，便知有沒有」。
扮靚冧男友
有Kelly呢位樂壇天后出巡，嗰日當然吸引唔少市民眼望望，但佢就無視旁人注目禮，繼續施施然研究咗一輪之後，結果都係冇幫襯，轉而行咗去女裝部慢慢再揀過。
Kelly平日超級深閨，每逢佢出席活動，唔係被大會贊助名牌服裝，就係由形象設計師幫佢配衫，所以唔使出門都有靚衫着，閒時想見Kelly去街都幾難，但早排Kelly至去尖沙嘴連卡佛掃化妝品，今次又去中環分店入貨，唔知Kelly係想對首飾取經抑或女為悅己者容，要扮靚冧男友Alex呢？
Textby關仁
