今年是鄭嘉穎入行的第13年，除了多年前被賣到台灣過的坎坷日子令他心情跌宕外，早前他的臉上再次罩上陰霾，與戴思聰的賣身契曝光，令鄭嘉穎差點賠上稍為有起色的事業，或者真的是善人樹上會結善良的果子，他的人氣卻因此事而上升，實在始料不及。 撰文：馮美茵
聖經中有一節金句：「你們倒要愛仇敵，也要善待他們，並要借給人不指望償還，你們的賞賜就必大了。」（路加福音第6章35節）筆者不是聖人，坦言未能做到上述的情操，莫講說愛，有時連寬恕別人的心也未必能做到。相信鄭嘉穎對此節金句有一定的感觸，不知道他會否寬恕他的敵人，但相信在某程度上鄭嘉穎真的要多謝他的敵人。因為他跟戴思聰簽下「賣身契」的事件曝光後，戴思聰被冠以「樂壇吸血鬼」惡名，而他的受害人身份，令外界對他抱着同情及憐憫的心態，而他也由戇居的負面角色進展到人氣急劇上升的紅人。
否認扮可憐博同情
對於昔日恩師戴思聰，鄭嘉穎日前接受訪問時仍不欲多講：「呢件事係令多咗人留意我，但我真係唔想講呢樣嘢，因為唔適合𠵱家講，等件事完結咗，我一定會講，但唔係今日講。」被指在事件上扮可憐博同情，鄭嘉穎聞言說：「喺呢件事上真係乜都唔講得，我可以講嘅我都會講，我只可以講我冇扮過任何嘢，我一直都採取沉默，其他人點睇我控制唔到。我入行13年，鄭嘉穎嘅人格，好多人會睇到，就算件事未傳出嚟時，都冇人估計到今日發展嘅結果，由初頭大家認為我戇居，好negative，到𠵱家turnout到咁positive，雖然件事未解決，但有咁嘅turnout，都冇人可以預計。」
人氣代價冇覺好瞓
可能因為愈是不出聲，就愈令人同情，連一向敢言的向太陳嵐都看不過眼大罵戴思聰；無綫高層樂易玲也公然力撐，並表示會安排更多工作，讓他賺取更多錢去打官司；就連劉家昌也對他愛護備至，除了收納他為入室弟子外，更為他度身訂做寫了一首新歌《無可奈何》，並安排他每晚擔任演唱會的嘉賓。鄭嘉穎人氣急升，帶挈本來播映無期的倉底貨《飛短留長父子兵》也重獲新生，收視更跑出，撼贏同期的大製作《火舞黃沙》，鄭嘉穎一下子頻頻見報，出席活動，廣告接踵而來，劇集一劇緊接一劇，近日正趕拍《通天幹探》，可憐人終捱出頭來。
「人氣係要付出代價，近排真係好忙，真係好想可以好好咁瞓一覺，但有機會就要把握，直到體力負荷唔到為止，𠵱家都籌備緊啲嘢，但要遲啲先公布。無可否認，今年我嘅成績係最好，亦搵到有代表作《天幕下的戀人》，我信我之前種落嘅種子，今年睇得出有收成，而唔係因為一單兩單嘢而令我有成績嘅。」
舊愛王馨平有慰問
事情最終結果發展如何，仍未知曉，惟有箇中的經歷才令當事人刻骨銘心，令鄭嘉穎有所領悟，「我對傳媒嘅感覺真係改觀咗，以前我好怕傳媒，最好避免接觸，因為唔知講乜，我又唔係好識講嘢，加上𠵱家傳媒嘅風氣興報料，你冇料就冇人做訪問，我咪諗唔做就唔做囉，亦唔會諗同記者做朋友，但經過今次件事，發覺原來呢行都有好多正義感，大家係畀好多支持我，我好感激。」那麼前女友王馨平有否致電慰問，鄭嘉穎坦言：「佢透過一啲以前寶麗金嘅同事問候，叫我唔使擔心，我都好多謝佢。」
攝影：陳俊強
髮型提供：CyrusfromHairCulture
服裝提供：CalvinKlein
場地提供：尖沙嘴HairCulture
