近日有指李克勤以賤價500元搶走阿叔林尚義在世界盃節目中的重要位置，前晚二人做節目時談笑風生，阿叔更開玩笑拿出500元遞給克勤，但一提到巴士阿叔陳乙東，阿叔則厭惡地說：「呢啲咁嘅人渣。」
近期無綫的世界盃節目《頂Cup世界盃晚晚有德Fun》是非多多，有指李克勤為討好無綫，以賤價每日500元擔任該節目主持，令阿叔林尚義淪為嘉賓主持。對於這個傳聞，阿叔前晚在電視廣播城接受訪問時說：「同克勤冇不和，話到克勤五百蚊就搶咗我個位，寫得咁少，其實我哋一人一項工作，邊會有衝突。」
拒絕無綫挽留
當記者要求克勤與阿叔合照時，阿叔忽然從銀包拿了500元出來遞給克勤，並說：「等我幽佢一默，做番場戲畀記者睇，呢張相好有價值。」二人齊齊拿着500元笑哈哈合照後，阿叔就收起鈔票。
阿叔接受訪問時，監製李漢源走過來替他按摩，又叮囑他有時間就回來，但阿叔笑說：「咪搞！做埋呢十幾日就收工。」
原來監製之前跟阿叔密斟，希望他不要退休，阿叔說：「監製係叫我唔好退休，其實TVB點會趕我走，呢啲講法係無中生有。」
對於臨床心理學家羅志華認為阿叔可能更年期，巴士阿叔陳乙東又提議他飲浙江醋減壓，阿叔回應說：「由得人話，人哋話點就係點咩？個巴士阿叔，呢啲咁嘅人渣，唔好再講佢啦！原本上嚟做節目好開心，但搞到咁多是非，又俾狗仔隊影我屋企，我就唔鍾意。」
否認不請自來
至於另一位是非人物林敏驄，前晚錄影《心大心細》時再度澄清：「想再澄清我冇不請自來世界盃節目，我同無綫簽咗九集，但監製話三集，我唔明監製點解咁講，呢個節目搞到咁多風雨，我好似每日生活喺伊拉克，日日俾人轟炸咁，暫時我唔會再上呢個節目，免得俾人話我搞嘢。」
記者再追問監製李漢源，他說：「搵阿驄做三集係肯定嘅，但克勤去咗德國後，係有提過吓搵佢做嘉賓主持，同佢度嘅期唔止九集㖭，但呢排啲報道對阿驄唔係幾公平。」
此外，歐倩怡前晚錄影《心大心細》時，被追問其男友郭晉安和佘詩曼拍劇傳緋聞一事，她氣定神閒地說：「我同安仔一齊住，一齊睇呢本雜誌寫嘅嘢，覺得係笑料，我同阿佘識咗好耐，我唔信呢啲報道，我對安仔絕對有信心。」
採訪、攝影：王崇穎
