183Club早前來港造成哄動，一眾香港藝人如梁漢文、鍾嘉欣和蒙嘉慧卻不知道183Club是「乜水」，其中跟明道合作過的應采兒更質疑183Club究竟憑甚麼走紅。
應采兒
「你唔好問我喇，我真係唔知佢哋點解會咁紅，我絕對唔係佢哋fans，我身邊亦冇朋友係佢哋fans，可能真係套劇嘅效應都唔定，我以前喺台灣都同明道合作過拍劇，佢好好人。」
陳豪
「係咪今屆嘅香港先生呀？其實我對佢哋冇乜印象，不過外形幾好呀，青春已經係紅嘅本錢，如果唔係都唔會迷倒咁多少女啦。我呢排拍劇拍到冇時間睇電視，之後有時間都想睇番佢哋套劇。」
梁漢文
「我都有聽過183Club，不過就唔係好知佢哋個樣係點，冇乜印象，佢哋紅係咪因為佢哋個個都咁高呀？」
鍾嘉欣
「劇集《王子變青蛙》我只係睇過吓，印象比較深刻都係明道！最短頭髮嗰個男仔（指顏行書），我以前喺加拿大見過佢參加歌唱比賽，佢哋𠵱家咁紅，可能真係同套劇播出有關啩。」
蒙嘉慧
「我冇睇過套劇，所以印象唔係好深刻，可能佢哋套劇真係做得好好啩，不過我冇乜朋友係佢哋fans，你話佢哋好紅，我真係唔知亦都唔明，不過每個人都有權去選擇自己嘅偶像。」
