明星飾物：潮星飾物搶眼夾大件

明星衣着，動輒過萬等閒事。Kelly身上的Chanel、Dior，單係上衣一件經已5位數字、Joey腳下的AnnDemBoots埋單亦要7千幾，貪靚界中的民女如你我想跟亦無從；唯一例外應該是飾物，一班潮星無論平貴，只要夠大件顯眼，朱義盛上身亦不拘，既然千元百塊就可以跟星看齊，這個風跟得有理。
記者：吳小明
攝影：陳鋾鈞
Model：Chinsky@StarzPeople

米奇奪Fiona芳心

自家配飾店Atelier廣邀旗下飾物品牌設計師Crossover的作品，獨沽一味買可愛Cutie公仔，當中尤以迪士尼卡通人物米奇及米妮最得人鍾意，高成兩吋幾立體造型米奇老鼠加超級波波鏈掛上心口，方圓十里開外都見到，難怪新紮師妹薛凱琪都馬上擸番個。

■薛凱琪出席影視博覽開幕咁隆重都戴上，仲識用番紅黑衣服襯米奇，咪當朱義盛飾物係流。

■Atelier米奇老鼠喱士包珠頸鏈$980（A）、白色通花上衣$399（B）

祖兒Janice撞牌子

呢幾季ChunkyBulky大件頭飾物係主流，影響力連高級珠寶界亦受波及，紛紛轉陣新添大件寶石配件，而朱義盛界玩法當然更Free，幾乎可以擺得上頸的大小物事都用來作配飾元素，當中來自新加坡的N.O.OSlynn取材極廣，由Vintage舊飾拆下來的晶石珍珠，以至服飾細節的喱士鈕扣，甚至爛銅爛鐵般的粗鏈銅圈，一一都放進設計中，一抽二Lung好搶眼，極有OnStage的舞台效果，跟同樣要在台上鬥光芒的潮星天造地設，所以Joey同Janice就算撞牌子，都一樣照戴。

■N.O.OSlynnCharms頸鏈$1,180（A）、粉藍背心$249（B）

■容祖兒這條N.O.OSlynn喱士公仔布偶炒埋一碟，點睇都屬全身焦點。

■Janice的手鏈亦七彩斑斕，幸好識得着得素淨一點戥番勻。

■N.O.OSlynn布鈕喱士Brooch$480（A）

■N.O.OSlynn鳥籠吊飾耳環$490（A）

熱帶風味啱祖兒

近年容祖兒的打扮風格愈趨多元，不再獨沽一味日本味，AnnDem上身平時見唔少，但如TropicalSummer熱帶女郎的造型都叫少見，若加珍珠玉石的配飾絕對唔襯，有若木珠質感的澳洲品牌Philippa，其Resort度假感覺的配飾，跟這身打扮則襯到絕一絕。

■容祖兒出席音樂會慶功，髮型似寶黛麗，再加熱帶風情HalterNeck，Exotic到暈，所以只以Philippa紅藍手鈪相襯，叫做襯得有紋有路。

■Philippa藍色及黃色手鈪各$520（A）

■Philippa淡粉紅色GlassInfusedResin仿木珠頸鏈$980（A）

新貴襯新Jill

細妹衞詩歌路形象跟家姐衞蘭有異，但同樣愛大堆頭飾物配件，佢就睇中來自日本去年才創牌的SofieBanana，設計師YukiY.亦愛以布鈕珠仔作飾物，唯一不同是感覺極為卡娃兒，少女味濃到化不開，個人意見認為阿Jill形象較野，配BlingBling飾物較佳，卡娃兒還是留給Janice好啲。

■Jill的桃紅低胸吊帶加緊到爆西裝背心，都幾野性性感，以Cute底的SofieBanana花鈕珠仔鏈相襯，似乎有點不倫不類。

■SofieBanana車仔布鈕頸鏈$790（A）

黑色蛋撻愛不離手

丹麥品牌Pilgrim呢隻黑色圓形戒指，曝光率奇高，因為Janice由年頭至年中不下三五七次公開場合都戴住出鏡，成個蛋撻咁大個戴上手，留意唔到至奇，想跟不妨買番隻白色戴吓，更啱炎炎夏日；而且Pilgrim的作品風格多樣化，由玩味到典雅甚至Punk味骷髏頭都有，以下這款骷髏頭主題飾物，都是Janice囊中物。

■Janice

■Pilgrim骷髏頭吊飾腰鏈$1,180（A）

■Pilgrim白色圓形戒指$590（A）

舒淇冧印度風情

來自澳洲的Damsefly，設計師曾往印度學藝，是以作品流露一份遠東的古雅風情，較為適合配搭浪漫女人裝束，當中祖兒對上一張唱片封面及舒淇出席巴黎LV旗艦重開，就曾分別戴過Damsefly吊飾耳環。

■Damsefly吊飾耳環$1,250（A）

■Damsefly吊飾頸鏈$1,450（A）

Shoplist：
（A）Atelier（23751622）尖沙嘴新港中心235號舖

（B）breadnbutter（21112760）銅鑼灣時代廣場514號舖