巴西隊雖然喺今屆分組賽打得唔好，但一班森巴擁躉仍然堅信球隊可以第6度捧走世界盃。當問到佢哋阿根廷最近鼓其餘勇，巴西球迷就極唔認同，並睇死宿敵打唔贏巴西咁話喎。
多蒙特噚日上演咗亞洲冠軍挑戰世界一哥嘅F組大戰，背城借一嘅日本面對打風流波嘅巴西，點都好睇過阿根廷對荷蘭呢場名次爭奪賽。有線直擊隊喺多蒙特球場附近訪問過雙方球迷，佢哋都不約而同地表示對國家隊目前嘅表現有啲失望，尤其是日本球迷更希望日本足總喺球隊出局後，換走巴西籍教練薛高。
彈表現不及02年世盃
唔知係唔係日本人有錢啲呢？喺多蒙特見到嘅日本球迷比巴西擁躉多好多，亦可能係佢哋知道今場好可能係日本最後一場賽事，所以都傾巢而出咁出嚟捧場。問到佢哋日本今屆打成點，球迷大多數都覺得好失望，覺得球隊成績不及4年前喺自己主場嗰次。佢哋認為責任最大係教練薛高，所以希望佢會自動引咎辭職。
至於巴西球迷方面，佢哋同樣認為國家隊分組賽表現唔理想，前鋒朗拿度頭場都係冇波入，如果對日本再入唔到波，相信淘汰賽時「大哨」會冇咗個正選。幸而朗拿度對日本時已及時用頭槌開齋，仲梅開二度㖭。
一位巴西球迷被問到阿根廷狀態大勇，點睇呢支南美球隊時，佢顯得非常激動，話明巴西就算點唔好，世界冠軍最終都係巴西，因為佢個人認為巴西會愈打愈好。佢話：「阿根廷攞冠軍？贏到巴西先算啦。」
有線06世界盃嘉年華，將於今晚9:00pm——11:00pm，播出世盃外景隊採訪滙報
