今日開始進入16強淘汰賽，場場搏命，亦冇咁多強弱懸殊嘅賽事，上盤相信唔會好似分組賽開得咁多，下盤客發圍時機應該到。
今日尾場阿根廷對墨西哥，好似冇得打咁。講真小弟認為阿根廷係咁多支勁旅中，分組賽打得最好一隊，最後一仗面對荷蘭，半力對陣，仍然玩弄對手於股掌之中，雖然各得1分，不過真係大把喺手。
今次對住墨西哥，基斯普、沙維奧拿呢班正選出番晒，列基美、麥斯洛迪古斯後上攻門，連美斯、泰維斯後備亦都好得人驚，講咗咁耐，係咪以為小弟一定揀個上盤呢？唔好意思，今次係推介下盤。
初盤阿根廷讓到一球/球半，街坊球迷都會諗，阿根廷一定贏，博上盤等於半個博一個啦，不過講真一場過淘汰賽，係咪咁易贏兩球呢？位於中美洲嘅墨西哥，對阿根廷真係熟晒，防守力亦唔弱，一心求守，狠辣踢法絕對唔少嘢，千祈唔好俾墨西哥上仗輸畀葡萄牙嘅表現嚟衡量；都係嗰句，夠出線就得啦，今次一於捧墨西哥下盤。
德瑞「鬼鬼哋」博「大」
頭場德國對住瑞典，讓到半/一就真係「鬼鬼哋」，上下盤就唔會揀，反而追個「大」。德國貴為主辦國，受主場球迷影響，淘汰賽都要焗攻啦，難得前鋒高路斯腳風順，滾吓滾吓都有入波機會。不過瑞典絕對不能被低估，唔知點解呢支北歐兵今屆十分慢熱，到分組賽最後一仗對英格蘭，機動性終於返晒嚟，死球戰術更加令頭槌一向唔錯嘅英格蘭手忙腳亂，德國分組賽最後2仗雖然冇失波，但防守企位仍然有問題，既然雙方都有入波能力，2倍大真係博得過。
牽牛