張堅庭同好友吳思遠，近日籌備拍一套笑片《合約情人》（暫名），講述男主角有位潮爆嘅ABC（美國出生嘅華人）女友，但佢嘅內地父母性格好保守，男主角擔心雙親接受唔到。春節時內地父母催個仔帶女友回鄉見家長，於是男主角就諗到搵另外一位新潮女友頂包，試探吓父母接唔接受到一個咁樣嘅新抱。
仔仔或接拍
張堅庭一早就斟咗范冰冰扮ABC，原意考慮𠵱家當紅嘅黃曉明或者胡軍做男主角，不過黃曉明透過經理人回覆話冇期，而胡軍就話冇興趣拍喜劇，所以張堅庭𠵱家仲頭痕緊搵邊個做男主角。
由於檔期唔可以一拖再拖，張堅庭𠵱家惟有喺港台兩地幫范冰冰物色男友，佢噚日話：「台灣演員，我考慮F4嘅言承旭同仔仔（周渝民），佢哋都講得一口流利普通話，同我呢個角色好配合。至於香港演員，可以演喜劇嘅，我心目中嘅人選有古天樂同鄭伊健。」
