李嘉欣日前36歲生日，既有新歡許晉亨陪伴撐枱腳，又有舊愛劉鑾雄擲20多萬元刊登報紙祝賀，昨日她現身機場時，忍不住大晒幸福：「我今年生日過得好開心。」至今未與許晉亨離婚的賭王千金何超瓊，前晚出席公開場合時，表示嘉亨戀若開花結果，願意即時辦妥離婚手續成全二人。
李嘉欣日前高調與許晉亨（Julien）拖手公開戀情後，昨傍晚在胞姊及女助手陪同下，由渣甸山寓所前往機場，赴上海準備出席今晚的Dior時裝騷，熱戀中的嘉欣昨日全程笑容甜到漏，未知是否男友許晉亨的悉心安排，身邊還有兩名保鑣護駕兼搬行李。她甫下車即露出勝利笑容，記者恭喜她有新戀情時，笑容更燦爛，不過對於拍拖多久、是否感到幸福及有關劉鑾雄的問題，她都笑而不答，只說：「我知你哋辛苦，我去到上海一次過講，唔好意思。」再問到她有何生日願望？嘉欣終按捺不住大晒幸福說：「我今年生日過得好開心。」
強調單身
「大家都叫我何小姐」
另一方面，何超瓊前晚盛裝往灣仔君悅酒店，出席世界自然基金香港分區25周年晚宴，早前她自爆仍未與許晉亨正式離婚，不久李嘉欣即在生日當天，高調公開與許晉亨的戀情，令超瓊成為記者追訪目標。
超瓊接受訪問時說：「前兩日無情情有本周刊煩咗我一日，我都唔明有乜嘢咁大不了，我從來冇話過我哋冇分開，係人都知我哋分咗居，呢幾年大家都係叫我何小姐，佢（指許晉亨）又唔係第一次有女友，佢冇必要同我交代佢嘅私人感情，成件事唔關我事，我唔會畀任何意見。」
超瓊續說：「本周刊咁樣跟我做古仔，我對呢種報道手法好抗拒，我又唔係故事嘅主角，你哋要搵番佢哋啦。」問她有否與許晉亨談過此事？超瓊說：「我點解要同佢傾佢女朋友嘅事？我同Julien係好朋友，但唔一定要傾到呢啲。」再問她覺得許晉亨與嘉欣是否合襯時，超瓊說：「我冇意見，冇理由評論人哋，佢咁大個人要識取決邊個先啱佢。」
仍然關心
「當然想Julien開心」
問超瓊何時正式辦妥離婚手續？她說：「我唔想講，呢個只不過係法律程序。」記者提到她自爆未與許晉亨離婚後不久嘉亨戀即曝光，時間上頗為巧合，超瓊即說：「我上次出席活動嘅主題係幾個女性講自己嘅奮鬥史同生活，我只不過係透露個人現時嘅情況，唔係公開講畀傳媒聽。」
再問超瓊是否認識李嘉欣時，她說：「唔可以講得上係識，不過佢咁出名係人都知啦。」會否祝福他們？超瓊即表現抗拒地說：「佢哋嘅感情同我無關，我唔需要亦唔想成為事件嘅任何一部份，作為朋友，我當然想Julien開心，如果佢哋感情好咗，我都會開心。」
接受現實
「作為女友應知情況」
記者追問：「但係你哋一日未離婚，咁即係嘉欣冇機會結婚？」超瓊聞言即說：「呢個唔係問題，如果佢哋真係行到呢一步，有呢個需要，我就會辦手續囉，（嘉欣）作為Julien女友，應該知佢嘅情形，同埋作為女友，應該理解佢嘅情形先至選擇投入感情。」
雖然超瓊表示許晉亨若有意與嘉欣再婚願成全他們，但翻查資料，過去與許晉亨拉上關係的圈中女星多不勝數，當年他曾與劉嘉玲達談婚論嫁階段，可惜傳因許家反對，最終分手收場，可見許晉亨父親許世勳並不接受兒子娶圈中女星入門。
超瓊近日因嘉亨戀慘遭滋擾跟蹤，問到許晉亨可有為此事向她道歉？她說：「冇呢個必要，我自己都懵懵哋，畀人跟咗咁耐都唔知乜嘢事。」提到嘉欣生日當晚與許晉亨共度，許晉亨更被拍得褲鏈未拉上的照片，超瓊忍不住笑說：「我睇過張相，我懷疑係條褲嘅款嚟，佢有時真係咁失魂㗎。」
許晉亨有新戀情，何鴻燊會否失望？超瓊說：「爹哋一直知道我哋分開咗，大家都接受咗呢個事實，照𠵱家情形睇，係毋須揣測，我哋係冇可能復合。」
採訪：林妙萍、李珮洳
攝影：陳志嵐
