電盈（008）停牌復牌亦反覆過人，令到市場對此股感到難以捉摸，嚇親唔少即日鮮炒家。
噚日則有手痕友作怪，喺電盈市前交易時段，將叫價㩒到只有1元，令到電盈市值突然蒸發八成有多，當然這個1元叫價一閃即逝，但最嚇人是叫價升至4元後，曾在這水平停留過一段時間，真係令人擔心開市價會低於5元，如果有人在電盈停牌前追入又沽唔切，噚日唔多唔少都會被市前叫價情況嚇倒。
拖埋六叔落水
市場傳到小小超套現退出電盈後，會洽購電視廣播（511），刺激TVB股價急升6.8%至49.50元，成交5546萬元。同系的邵氏（080）更升12%至11.55元。邵氏持有26%電視廣播，電視廣播獲洽售的傳聞自然對佢有刺激。
黑客又話，邵爵士年事已高，都係時候要處理財產問題，而賣盤係最簡單一途，所以與電視廣播一樣，有賣盤概念。邵氏旗下有塊清水灣靚地可供重建，一旦重建計劃獲批，相信會令不少地產商虎視眈眈。況且急升後的邵氏，股息率仲有3.46%，都算理想，可謂進可攻退可守的股份。
華彩控股（8161）雖然有英國保誠入股支持，但股價始終是浮浮沉沉，好難玩。周四升至1.04元後，噚日又跌番4%至0.99元。芬佬朋友話，現時大市有調整風險，一啲仲未有錢賺，派息又唔吸引嘅公司要盡量避開，特別係華彩呢類成交已經萎縮嘅股份，買入後未必易沽得出。
阿虎