港股即市由日股帶住走，恒指跌過143點，埋單只係唔見17點，H指更反跌為升。
電盈（008）復牌，又再仍fall，收5.50元，跌25仙，葫蘆裏面好多未知數。現價嘅電盈，冇乜值博率，電盈C輪更係高危貨色，手痕嘅結果，係唔見錢。要博正股或C輪，都係等到股價回到消息見光前個位，即係4.80元左右。
假設麥格理同新橋，礙於某啲理由，例如政治理由，撤回冇約束力嘅買資產建議，電盈股價會點？
電盈C輪9773：電盈雖然仍fall，C輪4847則大升74%，上到80仙，有半球成交。隻輪交投少，輪價變化可以唔正常。睇睇數據，12月中夠鐘，溢價20%，槓桿率6.9倍，有效得3.7倍，引伸波幅高到62.8%，會飛咩？博正股上到6.60元以上，不切實際。正股唔郁計，隻輪都係會向下跌。
熱門電盈C輪9773跌17%，收75仙，跌幅比例啱數，有15.2球易手。溢價0.9%，槓桿率7.3倍，有效6.4倍。炒家好似唔記得，隻輪下周一最後買賣，咪手痕做嘢。末日輪，唔使理引伸波幅。
恒生C輪4774：恒生（011）通常成條隔夜油炸鬼，冇厘火氣，近日有啲郁，上禮拜最低94元，近日爬爬吓，昨收97.15元，升0.15元。C輪4774收20仙，升3%，有46球易手，咁嘅交投好少見。隻輪明年2月下旬到期，溢價11.2%，槓桿率48.6倍，有效13.4倍，引伸波幅16.2%。恒生波幅細，C輪好難炒。
章盛