大師兄返嚟啦！巴西返嚟啦！趙飛雲前晚睇巴西對日本睇得好開心，除咗朗拿度梅開二度外，巴西以多名副選上陣反而踢番出森巴足球的味道，睇嚟態況進一步提升的巴西隊，稍後遇上其他強隊時將有更精采的演出。
另方面，趙飛雲亦搵到投注巴西隊的竅門，就是投注總入球，前晚巴西贏日本4:1，總入球開5，1賠8，非常和味。
言歸正傳講股市，前日提過港美日三地股市重返20日線之上收市，短線走勢出現轉機。當晚杜指馬上受考驗，尾段跌幅雖然收窄，但仍跌60點，收11019，輕微低於20日線（現處11022）收市。
美股回吐，日股昨曾跌過270點，但午市出現大反彈，最後僅跌11點，收15124，並重返20日線（現處15059）之上收市。
港股受日股初段大跌影響，初段曾跌過180點，低見15682，其後日股跌幅收窄，恒指亦逐步回升，尾市一度倒升2點，最後仍跌17點，收15808。
港美日3地股市升破20日線後，齊齊出現後抽，暫時所見低位承接力不弱，後市可反覆向好。但值得注意是在聯儲局下周議息前，突傳出今次可能加息半厘，慎防是淡友反撲先兆。
前日提過太A（019）技術強勢畢呈，昨日趁初段大市回吐，在76.55元買入5000股，太A最後收77.15元。國泰（293）全購港龍後，大行普遍看好太A前景，美林出報告唱好，定目標價90元。
3705未成氣候
太AC輪不多，勉強可揀是3705，行使價85元，06年10月31日到期，溢價12.7%，槓桿率39.6倍，有效11.6倍，引伸波幅25%，街貨僅2.1%。數據可接受但交投較疏，除非太A短期升勢持續，否則揸正股較上算。
趙飛雲