呢個禮拜IT妹不停有新機試玩，真係大開眼界！到Last呢日要試一堆防水DC，心諗：「正呀！乘機游埋水啦！」，點知個變態編輯話要玩動感，一桶桶水用力潑落我度，搞到我不停飲水，攝影師同個記者仲企埋一邊猛笑！從此可見呢幾位先生毫不憐香惜玉之餘，對我手揸嗰部防水DC都好有信心吓喎！
記者︰陸俊雄
攝影︰黃子偉
ImageGirl︰Ruby
目前市面上嘅防水DC分兩類，就係一體化及外加防水殼2種，當中各有優點，如一體化防水DC就較方便，毋須喺落水前搞一輪預防功夫，機身體積亦較細小；而外加防水殼式最大優點係有效水深較高，可達至10米甚至40米，適合潛水用外，分拆式設計亦令DC常用性較大。
冇殼防水派
嫌煩唔想加防水殼，又或唔想花多千幾蚊買殼，只求簡簡單單去沙灘影吓SnapShot，一體化防水DC就至啱。
Ricoh廣角王落水照Wide
呢部RicohCaplio500GWide防水相機，市面上仲未有售，不過小記搶先試玩，各位相機發燒友恨唔到喇！今次睇住本報介紹先，望梅止渴都好。
500GWide有800萬像素，而最大賣點係有28mm廣角鏡。眾所周知，市面一般DC鏡頭只有35mm，要有埋防水功能唔使另加殼，佢暫時算係唯一。支鏡夠Wide，成班朋友去海灘影大合照就Fit晒；至於落到水，光線因折射影響，普通鏡頭影起嚟冇咁Wide，28mm廣角鏡就發揮到其好處。
除咗鏡頭，部機其他功能都幾有料到。好似閃光燈咁，佢閃燈強度可達10米遠；微距可近至1cm拍攝；2.5"防反光LCD芒；-10℃的環境依然可正常運作，去滑雪影相都得；更可用AA電池，咁就唔怕影影吓冇電。
底面兩試
免防水殼照落3米
游水要透心涼，齋留喺海邊玩好悶㗎，落得水就梗係想游深啲，至少腳唔到地喇！特別去海灘，睇住有魚仔喺你腳邊游過，感覺好得意，可以影低佢哋就最好。Olympusμ720SW防水相機，最啱我呢類有冒險精神嘅人。710萬像素，毋須加防水殼都可在水深3米下拍攝，再配合「水底抓拍」功能，以及一次拍到最多12張的高速連環快拍，莫講話魚，想喺水底耍套拳都影到！
1.5米防水兼超輕女生最冧
其實好多靚女唔識游水，所以唔難發現好多男仔鍾意拖住女友落水，行到水位近心口位置就開始停低。雖然女嘅唔識游水，但男友喺身邊，一樣夠Fun！如果呢個時候有部PENTAXOptioW10影低開心片段，女仔一定冧死！W10可在1.5米水深下拍攝，水位到心口就一定冇有怕。機身淨重140g，女仔最鍾意輕巧設計，講到咁白，男人識做喇！
小知識LearnMore
‧不論哪種防水配備，盡量事前做足充電、Format記憶卡等準備，免在濕機時補充。
‧將ISO、快門等數值盡量提高，減低手震影響。
‧水中攝影難對焦，應適時轉換微距、遠景等拍攝模式。
‧玩完後應風乾機身及防水殼，貪快曬乾會直接減低兩者壽命。
配殼防水派
嫌一體式防水DC唔夠勁，玩得唔盡興？咁就不如為自己部愛機，添番個防水殼，將水中活動範圍提升！以下介紹嘅5款專用防水殼，全部有效水深40米，真係潛落海影蘇眉都仲得！
高ISO減低手震
呢部600萬像的PanasonicLumixDMC-FX01具備28mm超廣角LEICA鏡頭，比一般數碼相機影得更Wide。佢可以配備防水殼，落水都影響唔到佢至Wide嘅發揮；加上ISO可升至1600，有效減低因水流移動，令拍攝出嚟影像變得模糊嘅情況出現。
10倍變焦Zoom出浮台
10倍光學變焦，好唔簡單。PanasonicLumixDMC-TZ1以3片非球面LEICA鏡片，令變焦功能如此強勁，影像唔易變形。佢仲可以配個專用防水殼，游住水Zoom出浮台，靚仔靚女即時攝晒入鏡。TZ1更內置18種拍攝模式，有「沙灘」又有「水底」，喺陽光與海灘用佢最啱。
生活防水夠方便
Olympusμ700，雖唔似μ720SW入水能影出水能攝，不過佢本身防水滴嘅金屬機身設計，就算俾水潑到、手濕揸機都冇問題。父母坐喺水邊睇住小朋友玩水，用呢部710萬像嘅防水相機影低可愛片段就最啱。μ700本身唔落得水啫，不過可以配專用防水殼，真係要拎入水影，同樣有計。
水中大芒睇真啲
大芒得人歡心，特別係機身細、芒超大嗰種，CanonIXUS65就係呢種搶手貨。呢部機有600萬像素，又有個3"靚芒，配個專用防水殼WP-DC3，水底用大芒睇多啲、望真啲，影相超過癮。其實水中影相好有難度，特別難對焦，IXUS65有9點自動對焦，呢鋪真係唔怕「焦」你唔死！
落水平玩全手動拍攝
Canon600萬像素的PowerShotA540，2千幾蚊有齊手動曝光、對焦、快門和光圈先決等功能，以入門級機種嚟講，都幾抵玩。如果想帶佢落水，都唔係冇可能，只要配個WP-DC2防水殼，想點玩手動拍攝都得喇！加上佢可以換AA電，想玩幾耐都得。
查詢
（a）麗確攝影（22925111）
（b）崇光百貨電器部（28318523）
（c）捷成洋行（29262987）
（d）Olympus（23762150）
（e）CanonHK（21702888）
（f）信興電器（28330955）