16強球隊已經產生，德國主場對瑞典。德國喺分組賽3戰全勝，以小組首名晉級。睇番一向不穩嘅德國後防線，明顯有所改善。揭幕戰對住實力麻麻嘅哥斯達黎加都要失2球，但之後贏波蘭同厄瓜多爾，都冇失波。呢點證實佢哋刻意加強後防實力。前線攻力就更加唔使懷疑，3場波已經攻入8球。
瑞典表現一般
相反，瑞典喺分組賽表現只屬一般。3場波淨係贏過巴拉圭，其餘兩場都係和波。瑞典踢法比較單調，一味高Q大棍，冇乜章法可言。今場對住有主場之利嘅德國，輸波絕對唔奇。一於簡單任務，揀主客和嘅主勝。
另一場推介係阿根廷對墨西哥。阿根廷喺死亡之組嘅表現相當不俗，先後擊敗科特迪瓦、塞黑及摸和荷蘭。事實上，阿根廷嘅進攻層面比較多，兩翼側擊及中間小組進攻，都踢得唔錯。上場對住荷蘭都有所保留，以副選上陣，賽果不能作準。
墨西哥輸少當贏
相反，墨西哥喺分組賽嘅表現就未如理想，淨係頭場贏過實力較差嘅伊朗，對住新丁嘅安哥拉都只能和波收場。面對小組最強實力嘅葡萄牙，就立即輸波。今場對住狀態大勇嘅阿根廷，真係輸少當贏。一於博阿根廷淨勝2球或以上，揀讓球主勝。
陳樹鵬（阿鵬）
有線球彩台主持
電郵：[email protected]