吾唱K：唔蒲K房唱LiveK歌喉演鬥聽

近日好多人為咗睇世界盃，都被逼捱更抵夜，每日由頭場一條氣扯到朝早5點，日夜顛倒真係好攞命。當全城瘋狂為咗睇「世界波」之時，原來有一大班唱歌發燒友選擇另類唱K，向真音樂出發，既可滿足個人表現慾、又可以同朋友作音樂交流，講緊嘅係正宗卡拉OK酒廊，一邊唱歌、一邊吹水飲酒，這裏無人Fing頭鬧事，只有以歌會友！

記者：羅灝汶　攝影：林栢鈞
Model：Jason、Phyllis、Fushi、Siuwan

「世界盃我生意好兩成！」

第一次來到YesBar，對於年紀輕輕的小記的確係好新奇，平時去開酒吧都會有卡拉OK可以任唱唔嬲，不過有駐場琴師唱Live又真係好少見，酒吧內個個懶理出面「世俗人」嘅足球熱，你唔會聽到有客人問「今晚盤口開幾多？」又或者「某場幾比幾呀？」，完全有種音樂大過天的感覺。老闆Raymond係音樂發燒友，早於3年前開業就希望可以以歌會友。Raymond：「自從開業至到現在，我已經識咗超過5,000位熱愛唱live嘅朋友，加上尖沙嘴地舖關係，經常都吸引到WalkIn客，世界盃只會令到我哋生意更好，因為100間Bar播足球，只要有一成客唔想睇波，就已經會流失到我哋間Bar，世界盃開賽以來，每晚至少多咗3至4成新客。」新客好快又變熟客，全因為入得來都會愛上唱Live嘅氣氛，係人都可以享受「勁歌金曲」嗰種Live氣氛！

猛料琴師95%歌識彈

世界盃來勢洶洶依然穩賺，駐場琴師WilliamWong（黃煒林）當然功不可沒，曾經畢業於TVB電視藝員訓練班，擁有12年幕前及舞台演出的經驗。一見面小記就覺得他相當面善，原來William之前在電視任幕前，但未進電視圈前是管弦樂樂手，經過12年的電視圈浸淫，決定重投音樂懷抱，日間是音樂老師、晚間就是YesBar的駐場琴師，一做已有3年多，絕對係場中台柱，William：「現在的酒吧卡拉OK，同樣地失去咗Live嘅感覺，有現場琴師嘅卡拉OK，全港唔夠十間，至於選曲方面，我會跟貼市場做曲譜，例如側田、衞蘭等等新歌都有，不過始終係LiveShow要每一首歌都識彈係無可能，可以達到95%客人要求，已經相當唔錯。」

■唔係吹水！YesBar真係晚晚爆場，客人都係以上班一族為主。

■老闆Raymond：「多得世界盃，令到我哋生意額激增兩成。」

逢周三比賽贏$3,000

採訪當日星期三，原來每個星期三YesBar都會舉行歌唱比賽，當中由酒商及YesBar聯合舉辦，今年已經是第6屆比賽，每個星期都吸引到十多位朋友上台參加比賽，目前已經誕生了28位參賽者進入第二圈，6月28日及7月5日將會舉行復賽，之後選出7位朋友於7月12日舉行總決賽。點參加？每位參加者於初賽時購買了6支喜達啤酒，即當作報名費（$126半打，以現場價目為準），冠軍可獲$3,000、獎杯及12支喜達啤酒。