黑麻麻嘅藥材湯水，見到都唔開胃，今次示範嘅Jade記得小時候都有呢個心態，縱使媽媽落足人參、燕窩、花膠等靚料佢都會揦埋口面，但自從幾年前佢患上產後抑鬱症，靠食中藥醫好，工作上跟中醫接觸又頻密，開始了解藥膳嘅好處，識得用溫和嘅藥材入饌，無藥味得嚟賣相又靚，家陣連囡囡都咁捧場！
記者：謝翠玲
攝影：陳陶鈞、陳盛臣
示範：Jade＆蘇榮星師傅
蔬菜肉卷清熱去暗瘡
價錢：$26/2人
需時：15分鐘
Jade食藥膳唔鍾意太濃藥味，像海帶只帶微香的便最愛用。最近她發現海帶原來除了煲綠豆沙，都可以用來做餸，煮醬汁清淡唔肥，最啱KeepFit人食。
材料
青瓜、紅蘿蔔、萵笋各半條、葱2條、豆芽3両、水𦟌8片、柴魚片1両、韭黃（用水拖軟身）1両、海帶2両、老抽1湯匙
簡易法
1.青瓜、紅蘿蔔、萵笋、葱切4厘米長段，連豆芽用水𦟌片捲起，以韭黃綁實；
2.將柴魚片、海帶洗淨，加4碗水放入鍋中煮滾至剩1碗半水，加入老抽成醬汁；
3.將肉卷煎2分鐘，倒入醬汁燜5分鐘即可。
貼士
如果想吃得更清淡和省時，可以省卻煎肉卷步驟，直接將肉卷以醬汁燜熟。
藥效
海帶：有降血脂，清血熱功效，有暗瘡的女士尤其啱食，不過體質虛寒、甲狀腺亢奮或孕婦不宜食用。
陳皮炒肉絲燒熱鑊落油更嫩滑
價錢：$25/3人
需時：15分鐘
Jade每日都要風塵僕僕的四出工作，吸吸埋埋街上的廢氣，長期咁落去都唔係好掂，所以閒來她都會用陳皮做菜，化痰又理氣，工作起來也特別有勁。
材料
陳皮3塊、青、紅、黃燈籠椒各半個、葱2條、脢頭豬肉5両、生粉半茶匙、生抽1茶匙、油半茶匙、鹽1/3茶匙、糖少許
簡易法
1.陳皮浸軟，刮白瓤，切絲。青、紅、黃椒切條，葱切段；
2.豬肉切絲，加入生粉、生抽、油、鹽、糖略醃；
3.燒紅鑊，將豬肉絲炒至變色，加入陳皮和三色椒絲同炒即可。
貼士
肉絲切得薄又幼，在炒之前一定要充份燒熱鑊才下油，炒起來便滑嫩。
藥效
陳皮：有氣濕、氣滯、胃頂不適，用陳皮入饌可調理身體，以有5年以上的新會冬至前大紅陳皮功效較好。
百合炒雜菜質感清脆
價錢：$20/3人
需時：15分鐘
百合是Jade喜歡用的藥材之一，因為吃起來沒有難聞的中藥味，而且質感清脆，每次炒清菜時，她都會隨意拋2個百合同炒，寓養生於家常菜中。
材料
百合2個、脢頭豬肉4両、生抽1茶匙、油、生粉各半茶匙、西芹1/4棵、甘笋半條
簡易法
1.百合剝開，洗淨泥污，豬肉切粒，以生抽、油和生粉略醃；
2.西芹切粒，甘笋切片後，汆水備用；
3.燒紅鑊，先炒豬肉，待變色後加入西芹和甘笋，臨炒好前加入百合略炒即可。
貼士
如果想食得爽口，甘笋事先不用汆水，直接跟西芹同炒。
藥效
百合：滋陰安神，補肺潤燥，尤其對身處更年期而有失眠問題的女性有舒解作用。
姬松茸蒸肉餅揀半肥瘦豬肉
價錢：$20/3人
需時：15分鐘（未計浸菇時間）
現今的小朋友很嘴刁，Jade笑言，她還好有這個秘密武器，只要一煮姬松茸蒸肉餅，4歲女兒便會乖乖扒晒碗飯，因為佢話呢隻菇個味道香過冬菇喎！
材料
姬松茸4-6隻、馬蹄4粒、免治脢頭豬肉6両、生粉半茶匙、鹽、糖少許、生抽1湯匙、青豆20粒
簡易法
1.姬松茸以凍水浸45分鐘，連馬蹄剁粒備用；
2.將姬松茸和馬蹄加入豬肉中，以生粉、鹽、糖和生抽調味，表面鋪上青豆，隔水蒸12分鐘或至熟。
貼士
脢頭豬肉腍滑但較瘦，如果想食落更嫩滑，可以改用半肥瘦豬肉。
藥效
姬松茸：有提升抵抗力、健脾益胃和防癌功效，身子不好的女士常用來入饌或煲湯可作保健。
萊服子蘿蔔湯煲太耐會燥熱
價錢：$30/3人
需時：10分鐘（未計煲湯時間）
家中有小朋友的關係，Jade平日煮飯煲湯的口味都要以小朋友為重心。幸好她的女兒自小已吃慣藥膳食物，對萊服子味道不抗拒，仲覺得似花生，愈飲愈鍾意。
材料
豬尾骨半條、萊服子1両、粟米1條、白蘿蔔1條、鹽適量
簡易法
1.豬尾骨洗淨出水備用，萊服子以紗巾或煲湯袋包起備用；
2.將切大塊的粟米、白蘿蔔和豬尾骨連萊服子以12碗水煲1小時，加鹽調味。
貼士
如果以連骨的豬肉來煲湯，最佳時間不超過2小時，煲太久會變燥熱。
藥效
萊服子：理氣、化痰、消食積，最啱消化不良同經常胃氣脹的女士，但留意氣虛或食完人參不宜服用。
中藥劑師劉略滔：「除咗中藥材，其實豬肉都有滋陰潤燥嘅食效，用嚟炒同煲湯都有滋陰嘅作用。」
Jade煮食Profile
家庭事業兩兼顧的現代SuperWoman，晚晚放工都會親自為家人入廚，她堅信菜式除了好味道，也要有養生保健的作用，所以愛以平和藥性的藥材混入菜式中。
（a）新蒲崗大成街街市
（b）爵祿街惠康
（c）啟德花園百佳
註：以上價錢以6月23日為準