一位老友K擁有兩批8號仔股票，一批係五萬股，以十元買入，8號仔股票五合一之後，得番一萬股；另外一批十萬股，係不久前以每股四個六買入嘅。第一批股票已經輸到暈啦，點解仲要買入第二批？老友K話：「一早對8號仔死咗心咯，佢跌到四個六，等於以前嘅九毫二，咪諗住溝一溝，唔會再死啩！」計起嚟，老友K已在揸住十一萬股電盈，總成本九十六萬元，即每股八元七角三分左右。上星期五（六月十六號）電盈收市價係四元八角，老友K賬面虧損四十二萬二千。
估唔到電盈喺星期一停牌，報紙話澳洲麥格理提出收購電盈主要資產，用乜嘢價錢呢？冇講喎，老友K走嚟問左丁山如何是好，佢打算死揸，直至全部消息正式公布以及交易完成為止。左丁山話：「你係啱嘅，應該繼續揸落去，唔好賣住，除非因為消息滿天飛，電盈股價竟然炒到去八個八，令你收復失地啦。橫掂揸咗咁耐，冇理由喺呢個時候出貨啫。揸住貨，你有權喺股東大會投票贊成或反對，扮阿Q，話自己有影響力，話唔定李澤楷要爭取你支持呢！」
老友K話「蘋果拆局」與「宋漢生蘋果批」嘅文字雖然睇到佢飲泣，但其中道理幾啱，就係電盈再經營下去，都冇辦法恢復大東電報局時代咁好賺，佢位公子教咗佢用Skype之後，佢已經未用過IDD，佢位千金搬出去住之後，根本唔用固網，只用流動電話，電盈嘅固網生意好難做，既然如此，有人肯出高價買電盈資產嘅話，股東有着數啫。
問題就係（一）出售資產價錢係幾多，（二）電盈得來大量現金之後，會唔會派番晒畀啲股東？當然要還清債務先啦，否則債券持有人唔肯過你。左丁山手上冇電盈股票，老友K叫左丁山打聽吓，於是周圍問人，得到嘅消息話，（一）《金融時報》有料到，差不多夠六百億（二）李察好想為股東做套好戲，派息唔會孤寒。不過呢啲傳聞現在冇人可以證實，只知賣得成嘅話，大多數人會叫好。