採訪隊推介
聰仔心水：阿根廷勝
華度心水：德國和瑞典
16強德國對瑞典，論呢邊氣勢，瑞典人絕對比唔上地頭龍。甚至兩軍分組賽整體表現，德國呢場絕對佔上風；但華度決定走偏鋒，博兩軍90分鐘內打和。
今仗足智彩開出德國Ｗ只有1.65倍，其實睇番呢邊大小博彩單位，普遍都高於呢個分頭，唔通德國人自己都唔睇好隊波，可以喺法定時間90分鐘內淘汰瑞典？
自己友唔睇好
即刻捉住幾位啱啱喺法蘭克福附近小鎮，奧芬巴赫嘅博彩公司行出嚟嘅德國佬問吓，呢場波覺唔覺得德國Ｗ好筍。睇呢個起碼300磅、成個肚都好似塞滿咗德國啤酒同香腸嘅肥佬Marcus就話，呢場波唔係想像中咁易踢，一對「箭頭」高路斯及普多斯基呢輪咁「弗」，實畀今屆打得唔錯嘅瑞典中堅美爾保及盧錫「嘜」死，分分鐘要靠波歷克入波至得。另一位德國球迷Stefan更認為，寧願對住班英國佬，好過𠵱家打睇嚟更硬淨嘅「北歐兵」瑞典。
論德、瑞兩軍分組賽畀到我嘅感覺，德國邊路防守始終差少少，尤其係右路費特列治，基本上我淨係聽過哈化柏林球迷讚過呢位守將（費特列治正係效力哈化柏林）；瑞典方面，教練拉格碧幾夠膽同對手鬥攻，郁啲就叫定幾位後備前鋒熱身，幾場都曾經踢過3箭頭陣式，唔係無機會攻入德國大門！
文：華度