澳洲同克羅地亞周四嗰場波都算緊張刺激，但賽情就點都唔夠場波個球證普爾好睇，事關佢先後向3名球員出示「7張」黃牌，趕佢哋出場。
「7張」黃牌趕3個球員走唔係IQ題，是活生生嘅事實！普爾貴為英格蘭首席球證，之前仲有傳媒吹噓佢可能有機會喺決賽執法，點知喺下半場，佢出咗4張黃牌請艾馬頓同史米出場之後，可能自己都做到懵懵哋，之後喺85分鐘向施蒙歷出示第2張黃牌，點知佢唔記得咗自己之前已經畀咗1張，仲由得施蒙歷喺場上「逍遙法外」；好彩施蒙歷完場前犯多次規，先俾普爾有機會趕佢出場！
呢單「3黃換1紅」嘅事件喺國際舞台都算罕見，連英國傳媒賽後都狂插普爾，更有賭波公司珊瑚將佢繼續喺世盃執法嘅賠率冷到得11倍，認真可憐！當時連澳洲嘅前鋒維度卡都提過佢一次，點知普爾堅持自己無錯，卒之咪領嘢囉！相信普爾呢場都係佢今屆最後1場執法嘅世盃比賽，GoodLuck！呢啲情況仲以為睇香港波先會見到，得啖笑嘛！點知喺世界盃都會出現，認真攞膽！
網民反應：最應該趕自己出場
球迷對普爾有咩評價呢？「人之常情，唔記得嘛！」「3張黃牌都好抵攞！」「GoodLuck，Poll！」「成場波普爾最應該趕自己出場先。」
名家話：執法充滿爭議性
本報名家阿呢斯奧又對普爾有何看法呢？「普爾成場波的執法都充滿爭議性，好似唔使慢鏡都睇到嘅手球、拉人都當睇唔到，如果佢仲繼續吹落去，我諗都幾得人驚。」
專家之說：球證表現亂晒龍
「球證今場的表現亂晒龍，一場比賽同一個球員可以收3張黃牌！對普爾來說是一場失手之作。但整體上說，他仍是英超一個質素最佳的球證，也是一個懂足球的球證。」
歡迎球迷來稿
世盃判官係1個世界盃期間專為廣大球迷而設嘅欄目，球迷如對賽事有任何投訴、意見，想同我哋分享，就快啲投稿啦！來稿勿過300字。
世盃判官體育版電郵：[email protected]
體育版傳真熱線：23703534