電訊盈科（008）停完牌又復牌，雖然一個二個買家出價出到天咁高，又話有幾蚊股息派，又話會私有化，但由於上面唔高興，唔知賣唔得賣成，電盈炒家心驚驚，搞到昨日股價即刻走晒樣，跌4.35％，收5.50元。
經紀黃話，呢類大型收購合併，好多時成為對沖基金豪賭目標，只要兩個買家一日未正式打退堂鼓，電盈都仲有機會炒餐懵，但呢類投機活動高風險，一定要眼明手快兼膽大心細。
一波未平一波又起，除咗電盈外，昨日又有報紙話，小小超搞掂電盈單deal後，有意收購TVB，消息即時令電視廣播（511）股價受追捧，升6.8％，收49.50元，成交股數115萬股，金額5546萬元。
雖然電盈單deal仲係未知之數，而且唔知有關消息堅定流，但昨日已有證券行即時幫電視廣播計數，里昂話睇電視廣播目標價54.50元。小初唔敢質疑分析員嘅專業意見，但單靠傳聞就叫買入，實在好勇喎。
慕容小初