菠蘿文：16強開波啦！今晚得兩場波，望埋去個賠率，好似德國同阿根廷可以出線喎！
侍仔：近屆嘅主辦國都能夠出線8強，墨西哥就係好好例子啦；加上教練奇連士文前一場贏波蘭後，德國足總話同佢續約，今場對瑞典重唔搏盡，為面子為國家榮譽。而且德國人對呢樣嘢特別重視，今次買「大」補波膽4:2啦！
招積域：你個預測都合理嘅，瑞典𠵱家前鋒啞火，分組賽第2場入巴拉圭嗰球，好聽嘅叫做有組織，柯碧克頭球點畀龍格保，難聽就係「符碌」。今次對德國想入波都難啦，德國贏2:0啦。
拿神：瑞典點會入唔到波？今場有伊巴踢正選，拿臣應該會係佢拍檔，話唔定好似歐冠盃決賽一樣，三兩腳傳送就送瑞典出線；仲有𠵱家瑞典受讓半/一，嗱，呢個仲唔係重插瑞典嘅玄機？
菠蘿文：但前晚聽瑞典教練話會練12碼喎，仲連頭5輪嘅人都排好晒，咁呢場會唔會有機會和波？
拿神：場場淘汰賽都要有射12碼嘅準備，佢咁做都係正常啫，唯一玄機咪係伊巴有正選出囉。拿臣老謀深算，對住班豆𡃁德國後衞，實有計仔。
招積域：咁阿根廷對墨西哥嗰場你有冇計先，拿神，我就貼墨西哥贏波。
拿神：你摺埋啦招積域，你撐嗰啲東歐隊幾乎全軍盡墨，正一明燈！我就覺得墨西哥可以返屋企，阿根廷前鋒排基斯普搭沙維奧拿，可以摧毀任何防線；加上呢隊波係分組賽嘅進攻王，30次射門有16次中框，入8球僅失1球。墨西哥今次都係符碌出線，冇咗早兩屆嘅威勢，阿根廷又係大勝可期，3:1波膽首選。
高洛文