教統局噚日喺五星級金鐘港麗酒店設宴向商界推銷副學士畢業生，自由黨紡織及製衣界立法會議員梁劉柔芬獲邀上台講嘢，梁議員素來對打工仔嘅工作態度及能力有精闢見解，噚日一上台就有料到，批評港麗酒店全間酒店，上上下下無一個人有獨立思考。
原來做開紡織嘅梁太好眼利，發現酒店宴會廳用嘅枱布、椅套同餐巾都係同一種布料，而呢種布料表面睇閃閃令好得體，但係唔吸水，根本唔適合做餐巾。梁太認為酒店布置場地時唔夠細心，全間酒店竟然無人發現呢個佢一眼就睇得出嘅問題。對於梁太嘅批評，酒店方面噚日未有回應。
噚日場show唔少商界要人畀面出席，電盈副主席蘇澤光可能忙於做deal，半路中途就鬆人，幾十個記者亦步亦趨追問佢電盈賣盤發展，佢不斷耍手擰頭始終甩唔到身，惟有打電話畀司機求救，叫佢盡快嚟接佢走。
傳真︰2623-9278
電郵︰[email protected]