G組形勢可以話係三國鼎立，南韓、瑞士同法國都有機會出線，如果法國能夠擊敗多哥兩球以上，而南韓又打和瑞士，今屆比賽會好似04歐國盃嘅瑞典、丹麥同意大利咁，出現3隊同得5分嘅情況。
但由於今屆唔同外圍賽，係先計得失球差，然後再計對賽成績，現時只得1球在手的南韓係最唔穩陣，分分鐘以5分出局。所以雖然南韓多法國2分，但形勢未必樂觀，今晚對瑞士與其望天打卦，不如將對手重創，直接出線。
因此，今日我嘅推介係瑞士對南韓，南韓過去兩場賽事都喺落後嘅情況下追返，球隊永不言敗，瑞士要獵殺亞洲之虎，並唔係咁易。相信就算南韓贏唔到，亦唔會輸，我會揀南韓讓球客勝。
另一場推介係沙地阿拉伯對西班牙，雖然數字上沙地阿拉伯只要大數西班牙，烏克蘭和波或者輸波，咁都可以出線。但係要出現呢種情況，沙地真係要搵阿拉丁神燈幫手先得，始終汰弱留強係殘酷嘅現實，沙地上場對烏克蘭都無晒計，何況要對住大勇嘅西班牙。
前線攻力無堅不摧
西班牙今屆人強馬壯，上場對突尼西亞落後嘅情況下，都可以反敗為勝，今日篤定出線冇壓力，無論用正選或者後備，都一樣無堅不摧，今場對住沙地只係讓1球，以西班牙嘅攻力入兩三球絕對無問題，我揀讓球主客和「客勝」。
陳樹鵬（阿鵬）
有線球彩台主持
電郵：sscp_csp@yahoo.com.hk