前晚葡萄牙對墨西哥，墨西哥前鋒奧馬巴禾射失十二碼，令人聯想到葡萄牙龍門列卡度彭利拿賽前話假如隊波一路贏，佢下次唔只除手套，除淨底褲救十二碼都無問題喎。真係令人期待葡軍會喺淘汰賽同對手互射十二碼囉。
話說列卡度彭利拿喺04年歐洲國家盃對英格蘭時，曾除低手套，赤手空拳救出華素爾主射嘅十二碼，成為一時佳話。列卡度彭利拿就話除咗手套令自己更加靈活。
講真，咁多年嚟守門員同手套根本分唔開，就算普通波友去麥花臣、修頓打波，啲守門員大部份都戴手套，一來安全，二來家陣啲手套設計先進，對救波都有幫助，赤手空拳真係唔化算喎。講到除剩條「底」，其實球例、球場方面唔容許，至怕保安當佢係衝入場裸跑嘅球迷，趕佢出場。
判官話
其實都無咩嘢商榷，反正球例無話龍門一定要戴手套，佢自己蝕底啫。至於話除剩底褲……咪玩啦！
商榷指數：★★
以5★為最高
專家話：除手套志在騷擾對手
「除手套撲12碼，實際作用可能只在於騷擾主射球員，情況就像守門員救12碼時在白界上走來走去一樣。12碼首要是將皮球撲出，故戴不戴手套，實際上可能是如撲到皮球時，手痛不痛的分別。」
鍾皓賢（南華守門員）
網民反應：「人哋射失啫」
究竟外界對列卡度彭利拿有咩睇法？「佢有幾勁啫，係人哋射十二碼差啫。睇佢下場對阿根廷輸幾多（編者按，葡萄牙下場對荷蘭）。」「除手套救十二碼？佢唔想要隻手定啦！」