劉德華 戰術出色
南韓唔止踢得好，戰術運用都好叻，體力又好，之前佢哋採取上半場死守，下半場狂攻嘅策略，南韓球迷打晒鼓咁，好幫到士氣，我睇好佢哋贏，只怕俾人捉到路，今次會打得幾辛苦。
古天樂 整體質佳
我會比較睇好南韓，除咗因為呢支係亞洲球隊，想幫番亞洲人打氣外，呢支球隊整體質素唔錯，特別係安貞煥，佢打得好好，我覺得韓國呢隊波要贏瑞士冇乜問題。
陳慧琳 後防穩健
南韓上一屆歷史性打入四強，佢哋都算係亞洲強隊，我全面支持佢哋。我好欣賞南韓嘅後防，特別係門將李雲在，佢好勇猛，有佢幫手守住個龍門，睇嚟瑞士球隊想入球都幾難。
楊千嬅 往績支持
南韓喺上屆世界盃攞咗個第四名，證明呢隊亞洲球隊唔講得笑，今年佢哋整體表現雖然冇上屆打得咁生猛，但面對瑞士，應該有足夠能力取勝，我諗贏1：0應冇問題。
任達華 體能超班
我撐南韓隊，雖然佢哋嘅球技唔係最精，但整隊波好有農民精神，夠晒團結，又有活力，相對而言，瑞士隊係富強，但佢哋體能唔夠，我好希望韓國隊可以畀啲心機打入16強。
方力申 鬥志可嘉
我諗南韓同瑞士對賽，和波機會較大，因為我睇唔到呢兩隊波有乜必殺技，不過南韓令我最欣賞係，佢哋隊波好有鬥志。𠵱家個形勢，日本要出線都唔容易，亞洲球隊中南韓最有機會。
楊思琦 默契夠強
我着得南韓件球衣，加上大家都係亞洲人，我都好睇好南韓隊可以晉身16強，為我哋亞洲人增光。佢嘅中場朴智星上場時表現都好勇猛吓，比賽經驗好豐富，相信會幫到球隊，而球員之間默契亦夠。
