世界盃16強將於明日凌晨全部誕生，南韓挾着上屆世界盃四強的餘威力求再創奇迹，明日凌晨於G組與瑞士展開生死戰，勝出即可以晉身16強。擁有一半韓國血統的無綫藝人宋芝齡、崔建邦和洪天明，都異口同聲力撐這隊亞洲小龍，宋芝齡更教大家講：「呀喳呀喳！Fighting！」學定韓文打氣。
宋芝齡和崔建邦都很關心明日凌晨3點G組南韓vs瑞士的世盃賽事，他們日前分別穿上南韓球衣，並揮動南韓國旗，為鄉里吶喊助威，希望球隊順利擊敗瑞士，晉身世界盃16強。
講韓文越洋打氣
穿上整齊球衣的崔建邦，在球場內練波，宋芝齡不停在身邊以韓文大叫：「呀喳呀喳！Fighting!（意即加油！努力！）」母親是韓國人的宋芝齡表示每次看南韓隊作賽，她都必會在電視機前高呼這個口號，遙距打氣。
有個韓國爸爸的崔建邦，自上屆世界盃開始愛上足球，他說：「我上屆開始，每屆都買咗南韓球隊嘅新球衣，因為着住波衫去睇波支持，份外有feel。南韓對瑞士場賽事，我約咗爹哋同細佬落吧睇波。」崔建邦表示不熱衷賭波，但為了支持南韓隊，他特別破例，並說：「呢場賽事我同朋友賭一餐飯。」
洪天明半力支持
崔建邦表示南韓隊中最欣賞中場朴智星、前鋒李天秀和安貞煥，崔建邦說：「佢哋三個係球隊嘅中堅分子，尤其安貞煥，佢雖然冇速度亦冇技術，但好有運，由上屆開始次次出場都令球隊有運行，上次對多哥嗰場波，全靠佢入多一球先至贏波。李天秀就好有技巧，佢進攻都好全面，而朴智星係曼聯嘅外援，梗係有番咁上下，佢真係可以講為國增光。」
母親是韓國人的洪天明，也力撐南韓隊，天明日前在電話中說：「我一定會捧番韓國隊，佢哋係亞洲球隊嘛！雖然我唔係最留意韓國隊嘅表現，但睇過佢哋作賽，球員好後生，體能同鬥心都好強，我睇好韓國隊2:1勝出。」
上屆殿軍 被睇低
南韓上屆世界盃挾主場之利打入四強，來到德國於G組卻一直被看低幾線，遇上世界盃新丁多哥以及98年盟主法國，更加落筆打三更，兩場賽事均於上半場先失一球，不過憑着韓國人獨有的鬥志，以及調動得宜，以一勝一和得四分，暫列小組第二名，今場只要全力擊敗瑞士，即可晉身16強。
採訪：比華利 攝影：陳偉權
場地：SportX（海港城）
服裝：SFALO、Nike
宋芝齡髮型：AnsonTse@ii
