當全城焦點都係足球，進士今期又湊湊熱鬧，講番足球。咁，講邊班波好呢？好多人都知立法會班尊貴議員好多都係足球發燒友，既會吞pop唔開會走去睇波，耐唔耐仲會粉墨登場踢吓友誼賽。既然唔係咁多人睇過佢哋踢波，進士又不妨對佢哋嘅骨幹球員遂個分析一吓。
現代足球由防守做起，我就由立法會足球隊嘅後防講起。佢哋嘅後防可以話係全隊最煞食嘅賣點，原因好簡單，主要係由有氣有力嘅外援（議員助理）組成，印象中只有霍震霆、涂謹申、李華明、陳鑑林同王國興打過後衞。一句講晒，全部都係自動門──任人過。龍門方面，基本上由劉秀成同陳智思擔任，打個比喻，劉就係列文而陳就係簡尼，劉專輸醜怪波！
中場就精采嘞，中場指揮塔係楊森，叫佢指揮塔唔係因為佢似施丹，而係佢真係好似一座塔咁種咗喺地下度郁都唔郁。防守中場有長毛梁國雄，佢球技唔錯惟獨是好似荷蘭嘅洛賓咁冇乜人緣，冇乜人肯畀波佢。
講咗咁耐，佢哋班波到底真係有冇好波之人呢？有嘅，好似富仔鄭家富就有速度有技術，有時打翼鋒有時打前鋒，飄忽過祖高爾。仲有大嚿陳偉業，司職前鋒，柱躉式嗰隻，但球品甚差，插水撞人不特止，仲會輸打贏要，時常騷擾球證，仲乞人憎過米堡件哈索賓基，同議會入面嘅表現一樣。
蔡蔡子係秘密武器
大狀們呢？文弱書生，睇波嘅多。最有型格嘅球員又係邊個呢？進士會數鄺大狀鄺志堅。無他嘅，啲鬚夠搶眼，似足十以前美國隊嘅拉拿斯。
講到尾，每隊波都有一件半件所謂秘密武器，平時坐喺冷板，球隊無計可施嘅時候就會上場，當中以曼聯嘅蘇斯克查最勁。
立法會隊又有冇呢種大後備兼秘密武器呢？係有嘅，就係每次選舉都「號稱」有5萬福建票在手嘅菜菜子蔡素玉是也。佢嘅打法屬死纏爛打嗰隻，又有啲似溫布頓以前個雲尼鍾斯（即係喺X-men入面做成日撞穿牆叫Juggernaut嗰個），好鍾意抽水。進士見過立法會隊喺對駐港領事時喺中場「箝制」對手，當時玉姐二話不說就企咗喺其中一個最靚仔嘅領事後面，再兩手一「格」，人家當堂郁都唔敢郁！
遊戲文章，希望各位尊貴議員唔好介意——WillkommenZumFussball（球王比利送嘅）。
傳真︰2623-9278
電郵︰[email protected]