葛民輝最近在迪士尼動畫《反斗車王》中，聲演一架錢七拖車哨牙嘜，雖很有新鮮感，但也有一定難度，因為聲演迪士尼動畫限制較多，鬼馬的阿葛不能胡亂加對白，以免教壞小孩。
除了在電台可聽到葛民輝的聲音外，不少電視廣告也是由他配音的。雖然阿葛曾參與不少電影配音工作，但他仍視每一項的新工作為新挑戰，就如近日為迪士尼動畫《反斗車王》其中一架錢七拖車哨牙嘜配音，他也感到很有新鮮感。
演活百厭老人家
阿葛說：「配過咁多次音都係配人或者配動物，未試過為一架車配音，所以今次個感覺都幾新鮮，而且哨牙嘜呢架拖車係一個百厭老人家，所以配嘅時候把聲都要活潑啲。」
阿葛大爆為迪士尼配音有一定限制，他說：「因為迪士尼嘅動畫真係好健康好正氣，所以我哋唔可以爆肚，一定要講番好正面嘅字眼，就算爆肚都唔可以用啲咁本地、咁大人嘅說話。」
阿葛表示每次配音最令他覺得痛苦的，是要面對一個不完整的畫面，所以每次工作後都感到十分疲倦，他說：「好多電影公司都怕套戲會俾人盜錄，所以我哋配音時睇到嘅畫面，好多時中間都會俾個logo遮住，又或者係黑白色殘殘舊舊咁，配完幾個鐘真係幾攰㗎。」
阿葛表示由於他聲演的拖車哨牙嘜的車頭就是嘴巴，為了配合口形，他配音時面部表情也會比較誇張。
配泰韓片考功夫
阿葛覺得於多次的配音工作中，最難是為韓國及泰國電影配音，他解釋：「韓文同泰文有個相同之處，例如佢哋講『對唔住』三個字，已經有成六七個發音，咁我就要自己加啲字入去，幾考功夫㗎。」
採訪：李珮洳 攝影：仇志德
