劉鑾雄（大劉）日前以TheOne名義在報章刊登全版廣告祝賀舊愛李嘉欣生日，此舉成為全城熱話，前晚一班名模包括AnaR.、LisaS.及陳嘉容在中環出席水晶騷時均大讚大劉豪氣浪漫，AnaR.更指如獲此賀禮會不懂作出反應，多位藝人也對此等求愛方式很受落。
劉鑾雄前日承認一擲20多萬、以TheOne名義在報章刊登全版廣告賀李嘉欣（Michele）36歲生日的神秘人正是他，此舉迅速成為全城熱話。
AnaR.：「嘩，如果有人咁樣對我，我諗我會唔識反應，如果係我男友咁做，就真係sweet死，呢啲係真愛嘅顯示。」
LisaS.：「好浪漫呀，要畀掌聲佢，但我唔需要男友做呢啲動作。」
「好有童話feel」
陳嘉容：「我都覺得好感動。20萬珠寶同一個全版示愛廣告好唔同，送珠寶好物質，登廣告就好有童話feel，佢呢個動作我相信90%嘅女性都會好受落。」
容祖兒：「其實女仔好易𠱁咋，用少少心思就夠，不過唔會發生喺我身上啦，我冇收過咁有心思嘅禮物，冇人捨得咁落本。就算有可能，啲人都要集資先夠錢登廣告」。
蔡少芬：「我噚日喺日本返嚟，乜都唔知，人哋啲嘢唔想知，多謝晒，大家唔好問。」
陳沛嘉：「如果係我男友用呢種方式向我求婚，我實應承，但係換咗係追求者，我就只會講聲多謝，同埋我唔多鍾意人唔署名，唔夠直接。」
陳淑蘭：「佢（指李嘉欣）同許生拍拖我都唔知係咪真嘅，係就替佢開心，因為我都覺得佢兩個郎才女貌，嘉欣係好女仔，又唔鍾意蒲。」
舊愛龐維仁送祝福
至於惹來名模藝人一片羨慕目光，與許晉亨剛撻着兩個月的戀情又告曝光的女主角嘉欣明日將在上海出席名牌ChristianDior的秋冬時裝騷，除嘉欣外，內地紅星趙薇及台灣名模林志玲也是座上嘉賓，但肯定風頭都會被嘉欣搶去。
記者昨日致電嘉欣舊愛龐維仁，問他對嘉欣與許晉亨的新戀情有何看法？他說：「唔想再comment呢件事啦，總之我會祝福佢哋，無論如何最緊要Michele開心。」
採訪:梁錦雯、林妙萍 攝影:林德雄
