直播賽事，最難嘅就係控制環境。嚟咗德國大半個月，有線直擊隊噚日就做荷蘭大戰阿根廷嘅直播，但似乎俾兩批玩嘢嘅球迷，搞到直播要腰斬。事緣有線直擊隊邀請兩名荷蘭球迷接受訪問，當等緊衞星訊號期間，突然走出另一班荷蘭球迷，佢哋好唔客氣咁用身體擋住鏡頭，又唱歌又跳舞，搞咗幾分鐘先肯走人。如果呢幾分鐘係直播時間，咁就真係邊度都唔使去啦！
「茄喱啡」似星爺夠搞鬼
到咗正式出街時，兩位荷蘭球迷交足貨，用半鹹半淡嘅廣東話同香港球迷打招呼。當鏡頭一轉介紹吓聚集喺羅馬廣場嘅球迷之際，又走咗幾個阿根廷擁躉出嚟，好在今次只喺得幾個人，情況都可以控制得住，而且仲可以「爆肚」問吓呢班阿根廷球迷，叫佢哋估吓比數咁，佢哋講晒先識散水。總括嚟講，咁嘅環境做直播，係就係難控制啲，不過勝在氣氛好，有好有唔好啦！
講番嗰兩名荷蘭「茄喱啡」，佢哋真喺有啲似《喜劇之王》入面嘅周星馳。話到明準備開始直播啦，佢兩位竟然話人有三急，要去廁所，唔通真係咁急？到咗正式講對白嘅時候，明明每個人只係講一句對白，但佢哋都要研究好耐，又問長又問短。不過算啦！佢哋兩個又未學過中文，又唔識廣東話，咁肯學已經好好㗎嗱。
最後，當佢哋知道喺香港會有好多人睇到佢哋上鏡，呢兩個「茄喱啡」好似好開心咁，冇錢收之餘仲同我哋握手，差在最後冇講埋嗰句：「下次有通告記得叫埋我喎。」真係好搞笑。
有線06世界盃嘉年華，將於今晚8:00pm——10:00pm，播出世盃外景隊採訪滙報
