臨近特首選舉，愛面子嘅煲呔，真係一票都不能少，尤其係左派嘅票。既然係咁，梗係要盡力冧佢哋，特別係喺選委會必定有過百票嘅民建聯。所以呢，繼紆尊降貴去咗民建聯中委會、又拉大隊撐曾鈺成辦事處開幕後，煲呔最新力作，係7月10日參加民建聯嘅14周年黨慶酒會，用行動話畀民建聯聽：我好重視你哋㗎，信我啦！
民建聯查實向所有司、局級官員發晒邀請信，相信喺煲呔親疏有別指導思想下，啲高官都唔敢唔現身，你估真係唔驚煲呔連任之後自己被out咩。副主席阿謙話煲呔話要同佢哋建立親密合作關係，就算應邀出席支持吓，都係好現實啫，加上接觸各界團體，都係佢職責所在，有乜大問題呢？
不過，公民黨唔係咁睇，Alan梁就話呢啲行動擺明係政治交易啦，煲呔要佢哋支持嘛，梗係要買啲嘢返嚟。八方建議公民黨辦事處開幕時，邀請煲呔出席，咁就測試到煲呔係咪真係大細超得咁緊要喇。
傳真︰2623-9278
電郵︰[email protected]