亞視套《情陷夜中環2》就嚟結局，上周平均收視只得五點，約32萬觀眾收看，前晚台前幕後一班工作人員去咗尖沙嘴出席慰勞宴，惟獨葉璇同謝賢缺席。現場播番套劇嘅精華，播到張文慈發癲鍊住葉璇條頸時，陳寶轅大叫：「真係有你冇我呀！」播到葉璇用刀仔插死陳寶轅，點知插親自己嗰段時，麥家琪又大叫：「嘩，刀仔拮大髀呀！」全場笑到收唔到聲。
問麥家琪同葉璇嘅關係，佢話：「唔好咁樣啦，係傳媒寫到咁，有機會再合作我都唔介意，大家都冇嘢，我仲有啲欣賞佢㖭，做戲夠heart，個人又聰明又堅強。」咁做唔做到friend？麥家琪話：「呢啲嘢話唔定㗎。」講到收視麻麻，陳啟泰就話：「其實係唔滿意，但都開心，證明多宣傳唔代表同收視成正比。」
讚葉璇聰明
陳啟泰意思係搞咁多是非，都幫唔到收視，好似影射緊葉璇，佢又話：「嗰啲是非好煩，搞咁多嘢做乜？」張文慈就話覺得收視差係因為撞世界盃：「都冇人特登搞事，呢啲嘢要睇天時地利人和，收視唔好但口碑好嘛。」
