我眼紅西班牙有冠軍相！睇埋今晚嗰幾場，世界盃16強終於誕生，H組西班牙一致被睇高一線，但作為球迷，我卻會選擇支持烏克蘭！
支持烏克蘭，倒西班牙嘅主要原因係唔想足球舞台永遠都係嗰幾隊玩晒！當世界盃嘅16強同8強賽事戲碼，屆屆熟口熟面，唔係阿根廷對英格蘭、就係巴西鬥德國，你唔悶我都悶啦！
我討厭今屆嘅西班牙，就好似討厭當年嘅西德一樣！西班牙兵源充足、三線平均，中場創造力強，有個人突破能力，埋門把握強，前鋒年輕當打，後防又有經驗，真係有冠軍相。可惜，佢太早出力！又可能佢太早會對南韓，各位球迷要小心！
太早去盡隨時出事
西班牙今晚對沙地，贏就贏硬，但係佢哋會點贏呢！呢隊波，我覺得佢哋嘅高水準、好狀態太早出現，去到8強同4強變成強弩之末！點解咁講？曾有教練同我講，所有運動員，水準要keep住6、7成，到關鍵時刻先10成功力！西班牙兩場波都好似去到盡，之後嘅比賽隨時出事。我一於放長雙眼，睇佢可以走幾遠！
周鵬
商業一台《長傳急攻一粒鐘》
今晚播放時間晚上8:00pm-9:00pm