郭芯其去年經常出席不同活動及音樂會，但在年尾的頒獎禮卻不見她的影蹤。原來芯其所屬的唱片公司有感她當時仍未處於最佳狀態，所以要她等候一年才推出唱片，今年發力角逐新人獎。
每年各大唱片公司都會花盡心思去力捧旗下新人，務求他們得到大眾認同之餘，更想他們於頒獎禮上奪得獎項。不過芯其所屬的唱片公司深明欲速則不達的道理，所以決定用一年時間作訓練期。
曾經迷惘
芯其對於唱片公司的決定也深表贊同，她說：「我覺得公司咁做都係為我好，既然自己唱得未夠好，如果夾硬出碟嘅話只會得到反效果，咁我寧願用多啲時間去練習吓先。」話雖如此，芯其坦言在等候的過程中曾感到迷惘，她說：「有一排我去學唱歌，唔知做乜唱極都唱唔到，而且唱得唔好，嗰一刻我都唔知點算好，老師只係叫我唔好咁緊張，之後我自己學識放鬆，就愈唱愈好。」
花了一年時間積極裝備，芯其對於角逐年尾的新人獎當然有一定信心，她說：「呢一年公司幫我接咗好多工作，有商場騷、音樂會、廣告等等，起碼呢段時間有人知道我係郭芯其，我又將商場騷同音樂會呢啲工作當係一個練習機會，我比起其他新人多咗一年演出經驗。」
爸爸欣慰
近日芯其的新大碟已經推出，隨碟更附送了一本寫真集，內裏有不少她大騷美腿的照片。芯其透露身邊不少朋友都大讚寫真集拍得她很美，但其父親卻對此有微言，她說：「因為本寫真個主題係sell家居感覺，我爸爸睇到之後問我做乜着得咁少，又問我做乜着埋屋企啲瞓覺衫影相。」芯其表示其父雖口口聲聲怪責他，但從母親口中得知當父親聽到她大碟推出後，父親同樣感到高興。
採訪：李珮洳 攝影：陳慧安
場地提供：MarcoPolo（HongKong）Hotel
髮型：Kel@Hair 化妝：Bunny
服裝提供：BreadnButter
