連日來慘遭是非纏身及頻頻被狗仔隊跟蹤的阿叔林尚義，昨日凌晨終於按捺不住，在無綫世界盃節目中當眾扯火，力數周刊不是及直指遭巴士阿叔連累之外，昨日又直斥大廈看更失職，讓狗仔隊肆無忌憚進出。而巴士阿叔陳乙東則指阿叔扯火是因世界盃期間睡眠不足，更教阿叔飲醋下火。
早前的「巴士阿叔」事件再加上退休前最後一次擔任足球評述，令正牌阿叔林尚義成為傳媒追訪焦點，繼早前有報道指阿叔不滿李克勤在世盃節目中扮大牌，及被無綫迫他提早退休後，前日又有周刊指李克勤以每日500元賤價，奪去負責控制節目流程的重要位置，令阿叔淪為嘉賓主持，損失騷錢，一切是是非非加上連日來遭狗仔隊跟蹤，阿叔昨日凌晨主持《頂Cup世界盃晚晚有德Fun》時，終於當場扯火。
同伴打圓場
克勤：唔好咁勞氣
克勤昨日凌晨主持該節目時，宣布下周三晚會在美麗華酒店舉行一個名為「2006世界盃為阿叔喝采」真情聚會，其間他問阿叔有甚麼要向大家訴說時，阿叔即把新仇舊恨通通一吐而快，他說：「真情對話我當然發表我嘅肺腑之言，不過，呢一排阿叔都幾紅㗎！巴士阿叔搞到頭都大埋，完咗之後世界盃又開始，好多傳媒又話我同邊個不和，又話乜乜物物，有張報紙離晒大譜，有張（本）周刊話……」克勤見阿叔愈講愈扯火，為怕一發不可收拾，即打圓場對阿叔說：「唔好咁勞氣，唔好咁勞氣，我哋淨番多少留番喺真情對話講。」
記者昨日致電追問阿叔扯火原因時，阿叔沒好氣地說：「妖！全部都係作出嚟，呢啲煲水新聞，假嘅！係我同TVB講話唔做，監製叫如果我嫌辛苦嘅話，可以退休之後間中上嚟講吓波，我都話唔好。」
鬧人不留情
「我都射唔少12碼」
再問阿叔近日與克勤傳不和，二人見面時會否感到尷尬？他理直氣壯地說：「哼！大家得啖笑啦！明知呢啲係煲水新聞。」然後阿叔又直斥大廈看更失職，他勞氣地說：「個看更淨係識食飯，淨係識𢭃人工，有乜理由畀狗仔隊隨便出入至得㗎？係都要問吓對方搵邊度，要登記佢啲資料㗎嘛！」對於被指遭無綫減一半騷錢，阿叔說：「梗係唔係，我呢啲係成個世界盃咁計㗎嘛！」
另一方面，昨晚無綫播映的《新聞透視》以世界盃作主題，找來阿叔大講波經，原來阿叔對講波另有一番見解，他說：「資料嘅嘢叫鍾仔（鍾志光）講，我唔講，我嚟講波唔係講資料，朝早人哋睇報紙睇晒啦，我覺得唔好，所以永遠唔講。」提到阿叔罵球員不留情面，他說：「我打咗21年波，有乜嘢唔夠膽講？冇嘢我唔夠膽講，應該點踢先至係好波，你批評嗰啲球員，要人哋服你先至得，我最唔鍾意球員射12碼行後一步就咁踏前去射，呢啲12碼唔一定入，呢啲係我哋啲經驗，我都射唔少12碼。」
陳乙東教路
日飲一支浙江陳醋
對於現時主持講波時會加入球星花邊新聞，阿叔說：「無關痛癢嘅講嚟做乜？我唔理人，各有各講，人有人講，我有我講。我呢兩日都俾狗仔隊跟啦，唔通我返嚟做節目又有影響咩？」
除是非不斷令阿叔扯火外，一度被外界誤認他是「巴士阿叔」，原來令阿叔十分困擾。對此「巴士阿叔」陳乙東昨日在電話中以專家口脗說：「佢扯火唔關我事，係佢自己嘅問題，佢有啲嘢未解決，可能呢排世界盃唔夠瞓，唔夠瞓好容易扯火，腎上腺分泌唔平衡。周圍環境壓力亦會構成一定影響，例如親戚朋友對佢睇法咁，可能佢覺得自己所做嘅嘢唔符合人哋要求而產生幻覺，產生壓力。其實一個人最緊要睡眠充足，唔夠瞓嘅話好危險，唔覺意俾車撞到都有之，因為個人反應慢。」
問到陳乙東有甚麼減壓方法提供給阿叔，他說：「返大陸買支叫『天地XX』嘅浙江陳醋飲，一日飲一支，啲血自然會流快啲，平過飲雞精，亦可以一日食兩粒卵鱗脂都得，經過我呢啲方法，包佢好快康復，到時唔好再賴咗我。」
採訪：戴彩煥、李珮洳 攝影：陳順禎
