之前曾經寫過吓有關正體字、簡體字、中文熱等問題，估唔到今期《時代雜誌》封面大大隻三個簡體字「學漢語」，仲喺旁邊註埋x?h?yu，原來中文真係咁熱。我之前原本以為美加熱啫，睇咗裏便嘅文章，先至知道中文熱已經成為全球化現象。
就講南韓，舊年有十一萬人喺中國學漢語，今年增加到十六萬人，增長成40%。據《時代雜誌》講，𠵱家好多國家都要catchupintheracetolearnChinese，即係話除非你唔想做生意，想嘅就要快過人哋。
今年一月布殊總統撥咗大筆錢搵人教美國人學五種最有急切需要嘅語言，其中當然有中文。但係原來美國人眼中世界上最難學嘅五種語言之中就有普通話同廣東話。人哋要用一年去學西班牙話，學中文嘅就要三年。講真，香港人要學普通話一定快過人，因為我哋已經過咗書寫呢一關，好過外國人要由零開始；人哋都咁認真，香港人就唔好咁懶，學好普通話喇。五種最難嘅你識兩種，唔好咩。
學多種語言識朋友都好
不過唔好以為人哋要學我哋啲話就以為我哋冇得頂喎，掉番轉頭我哋更加要學多幾種外語。你諗吓，如果有個西班牙人用普通話同你講「再見」，你同佢講hastaluego，咁佢一定好想再見你。唔好以為學外語就係為咗做生意，識多個朋友都好吖。總之互相尊重。
我又問吓大家，《時代雜誌》嘅標題「學漢語」三個都係簡體字，而唔係正體字，咁反映咗乜嘢？反映咗外國人學嘅會係簡體字。
再問一句：香港小學生，使唔使學簡體字？
我認為我哋學生要先識寫正體後學睇簡體，因為係現實。
仲有，外國人應該先學正體外加一種中文輸入法，例如倉頡。
根本𠵱家唔識中、英文電腦輸入嘅已經係後現代文盲，或者叫e盲。我哋仲使乜要人罰抄書呢？應該叫罰打字。
當年有話用簡體字去解決文盲問題，但係新一代外國人唔係文盲，咁點先？
一個A一個B，即係一個日一個月，加埋就係「明」，按兩吓，搞掂。
我哋應該取消簡體字。
觀火
傳真︰2623-9278
電郵︰[email protected]