好多老友記為咗子女教育，憂心忡忡，就算子女入咗本地名校都未必滿意，不時考慮將子女送入國際學校或英美寄宿學校。左丁山在朋友之中，算係半個教育評論家，成日畀人問及教育問題，左丁山願意指出：（一）本港教育制度並唔係一般人想像咁差，過去培養咗大量人才，我哋嘅醫生、律師、會計師、工程師、銀行家、傳媒工作者、社工、公僕、教師等等，無論數量、質量，都位居亞洲前列。文化藝術方面，我哋都唔曳噃，音樂、話劇、電影、現代詩方面嘅人才，都有好表現啫。（二）讀國際學校或到外國讀中小學，學費好貴，而且冒上子女唔識中文（將來難搵工）風險，未必制得過，不如慳番呢啲學費，將來畀子女讀大學，到外國交流/留學。
子女教育，唔可以倚賴晒學校嘅。家長要以身作則，主動誘導子女自願性讀書、睇書，對中英雙語不畏懼；我哋交稅之餘，唔畀子女享受九年免費教育及三年高中低廉學費教育，蝕唔蝕底啲呀？省下之學費，送子女去補習中英文都仲有着數，補習唔係去甚麼補習天王度喎，而係去一啲正常嘅學校。譬如沙田陳太講，英國文化協會喺沙田圍呂明才小學（麗豪酒店後面）開班，每個禮拜好似上一堂，學費唔平，要二千七百元一個月，沙田啲中產家長爭住為子女報名！至於中文補習又如何呢？因為未有一個類似英國文化協會嘅中國語言教育機構，唔知去邊度好，大陸嘅「孔子學院」掛住在世界各地開辦，喺香港就同理工大學合作開咗一間，不如擴充營業，落區辦中文學習班啦。又或者，劉家傑既然辦英語學校，陶傑不如辦間中國語文學校，話唔埋可以名利兼收。