日本料理可以超平亦可以勁貴，只視乎你荷包有幾多貨，要食新鮮刺身同壽司就非到高級食府不可？我唔係咁認為囉。平，未必一定無好嘢，𠵱家話你知，$200唔使，就可以食20件壽司、1磅刺身加3款小食，足4個人份量食完捧住肚走，落肚嘅，通通係日日新鮮運到嘅鮮甜魚生。新鮮，應份，份量大大件，係Bonus，一啖放入口塞滿嘴，感覺好抵。
記者︰方綺君
攝影︰林栢鈞
模特兒︰Ellen（Salvador）
世界盃套餐 雜錦壽司拼盤
三文魚壽司，挪威三文魚肥美肉厚，大件抵食好Yummy；吞拿魚壽司肉質鮮紅，無筋兼油份少毫不肥膩，一睇已經食指大動；赤貝壽司入口爽脆，平時吃到的赤貝好薄身，「花日本」的赤貝大件肉厚，入口小心鯁親；蝦壽司係我至愛，蝦開邊蒸後再過冷河，肉質脆爽，咬落好有肉感。
絕無將價就貨
世界盃開鑼，有人話大家掛住屈喺屋企睇波，連帶食肆生意額都受影響。點突圍？「花日本料理」就整咗個世界盃套餐益街坊，剪低Coupon就可以$168優惠價，外賣1磅三文魚刺身加20件壽司拼盤返屋企。除套餐外，店內亦有幾款只賣$10嘅小食，我計過數，一個$168套餐再加3個小食埋單只要$198，4人食飽飽除每人$50有找，抵。
唔食套餐？店子設有冷凍櫃，可以自由選購刺身外賣返屋企慢慢歎。店舖提供免費切片服務，另每件刺身加$1可製成壽司，堂食客亦可到冷凍櫃自選刺身。平嘢無好貨？非也！你唔使驚店方會將價就貨，因為老闆本身經營刺身批發生意，批發店老闆開食肆，當然清楚行情點入靚貨，自己批發比自己再做零售，食物價錢一定可以比一般日式料理店定得便宜，個人認為無論價錢同食物質素，都好過嗰亭坐得迫迫狹狹的大型連鎖迴轉壽司店多多聲。
條數點計
抵喺邊？我問過「元×」，外賣22片裝三文魚刺身（約400克）$168，1磅大約等於450克左右，已經差不多係成個套餐嘅價錢；逐件壽司計又點？「元×」一個24件四人前壽司套餐$140，若拆開5件赤貝、5件蝦壽司、5件吞拿魚及5件三文魚去計，前三者每客兩件$15.5，後者每客兩件$12.5，求其配搭Order足20件差不多要$150，仲未計小食喎，你話抵唔抵嘞？
牛油焗帶子$10
澳洲鮮帶子，配以牛油、沙律醬和雞蛋混和的醬料，放在烤爐上燒，所以入口好有炭燒味。
海膽燒賣壽司$10
外層是魷魚片，上面是新鮮甜味的海膽，入口即溶的海膽加上煙煙韌韌的魷魚，兩重口感，師傅自家創作！
汁煮蠔壽司$10
廣島蠔夠肉地，厚度差不多同壽司一比一！經過豉汁烹調的蠔肉不會過濃搶去鮮味。
試食報告
搵食攻略
花日本料理（26671298）
地址︰太和翠怡街3號翠怡花園C座15A舖
營業時間︰星期一至五11:45am-3:00pm，5:45pm-11:30pm，星期六、日及公眾假期11:45am-4:00pm，5:45pm-11:30pm
交通︰太和火車站出新閘步行約3分鐘，穿過大埔太和路行人隧道直達
最好賣︰三文魚刺身日賣40磅，海膽刺身亦是熱賣之選
全店座位︰約50個
人均消費︰$30-$40