建築設計界無人不識嘅何弢（即係特區區旗同區徽嘅設計師），佢嘅基金會噚日正式成立，仲請到上任啱啱1周年嘅煲呔做主禮兼基金贊助人，喺會展搞晚宴慶祝，即場攞咗部份何弢嘅作品拍賣，執二攤做拍賣主持嘅恒隆陳啓宗。
陳啓宗先揼新地郭炳江40萬，再自揼50萬，淨係佢兩位，已經為個基金籌到90萬，全晚好輕易咁就籌到過百萬嘞。
何太代夫迎賓
4年前喺武漢中風嘅何弢，家吓仲喺東華醫院休養緊，每月醫療費要成3萬，聞說何弢舊年返港就醫之時，煲呔靜雞雞走去探過佢，知道佢經濟有困難，所以促成呢個基金會。據華華所知，何博士本身係愛貓之人，屋企足足養咗15隻咁多，相信今次籌到嘅款項，都可以令何家上下啲貓鬆一口氣！
主角抱恙冇現身，咁迎賓大任，就落喺何太羅玉琪，同佢位千金何熒身上，仲有鍾逸傑、梁振英做基金顧問團，陶傑就做司儀，加埋張浚生、孫明揚、霍震霆、盛智文等一眾名人賓客，筵開21圍，場面非常熱鬧。
梁振英拍心口
華華八到，本來噚日係由鄭大班做拍賣官，但佢事忙，又見梁振英拍心口做總指揮，所以佢冇出席，由陳啓宗頂硬上。
今年70歲嘅何弢，36年喺上海出生，喺培正讀完中學，就去美國讀大學，曾經做過現代建築之父Gropius嘅私人助理。香港聖士提反書院、上海新金橋大廈、香港五旬節聖潔會永光堂等，就係呢位建築大師嘅傑作。
李華華
讀者如有任何意見或報料，歡迎發送電郵至[email protected]。
