自由黨今期全力支持煲呔，添馬艦起新政府總部一句嘢都冇講過，簡直係無條件挺曾。八方真係唔知田少博乜，可能希望北京改變對佢哋嘅印象，好似政協主席賈慶林下周來港嘅宴會，自由黨唔理立法會開會，拉大隊到齊；煲呔聲稱最親嘅民建聯，都只係派部份代表出席；公民黨得一半人出席；白鴿黨更只由高達做代表。咁睇法，自由黨仲唔算係最畀面？
不過，自由黨嗰日都唔會太安樂，事關民主派分分鐘玩吓嘢，叫立法會主席數吓出席人數夠唔夠，自由黨都要飛奔返立法會，事關邊個夠膽揹起流會罪名？
好彩，你玩嘢時，佢哋都有兩手準備，田少話當日會安排一架車喺宴會地點，即係港島香格里拉嘅外面；只要立法會有乜依郁，部份黨員就會喺15分鐘內被運送返立法會喇。
主席係有優待，田少梗係唔使被遣返；而佢又自稱好尊重女性，所以黨內三女將，即莎姐、Miriam同Sophie梁都係有得留低慢慢用餐，新界特首發叔當然都唔使走。其他男丁，sorry，一定要返立法會救亡，鬼叫你唔係女人咩。
傳真︰2623-9278
電郵︰[email protected]