科隆呢個城巿話細唔細，講到大又未到佢喎，於是舉行英格蘭大戰瑞典呢場咁重要嘅賽事，全個科隆就係咁俾英格蘭躉佔據。賽事喺當地晚上9點開始，但呢班球迷就由早上9點已經開始飲啤酒，一飲就通宵，酒吧生意真係發過「豬頭炳」。德國呢個國家飲酒仲平過飲汽水，難怪呢度啲球迷嚟到都鍾意飲酒。
科隆最旺嘅地方係教堂大廣場，比賽未開始前，有線直擊隊就喺呢度進行現場直播。呢度通街都係球迷，當地下午4點有早場東道主德國登場對厄瓜多爾，氣氛一啲都唔差。尤其啲球迷睇住高路斯入完一球又一球，德國大勝3:0後，班德國球迷真係開心到跳舞。
打完頭場，尾場嘅英格蘭對瑞典仲有成3個鐘先至開始，夠晒時間食個晚飯，然後再到球場或者酒吧睇波。可能英格蘭球迷出咗名鍾意搞事，德國警方面對佢哋，早就帶齊晒裝甲、盾牌戒備。英格蘭球迷實在太多前科，現場亦睇到由英國派出嘅警務人員幫手維持班球迷秩序。
被迫和照飲通宵
睇波又點少得飲啤酒呢？尤其係德國出名多靚啤酒，係名副其實啤酒國。班英格蘭躉直頭當水咁飲，真係未開波個人已經飲到highhigh哋。英格蘭雖然最後俾瑞典迫和，但仍然首名出線，相信佢哋嘅支持者有唔少會飲通宵。
有線06世界盃嘉年華，將於今晚8:00pm——10:00pm，播出世盃外景隊採訪滙報
