精熙國際（2788）噚日股價有異動，唔係向上，而係向下，一度落到2元，亦係上市以來最低價，收2.45元，仍跌0.20元，跌幅7.5%。
公司前日剛開完股東會，管理層對明年同後年的業務前景好樂觀，好有信心，但一日之後，股價就大插插，雖然成交比過去幾日明顯大增，但都只係520萬股，拋售情況唔算太嚴重，但一下子插得咁深，耐人尋味。
集團主要生產電子產品零件，包括數碼相機及手提電話外殼、打印機及相機鏡頭周邊配件等，今年2月10日上市，售價2.20元，掛牌第2日升咗1個開，之後反覆回落，到噚日終於「潛水」，若公司冇不利消息，股價落到上市價水平，又可以諗得過。
05年（12月年結），營業額6.15億元，升17.9%，獲利1.56億元，升78.9%，每股盈利24.4仙，派特別息4.7仙。由於增加生產高毛利零件，以及經營成本下降，分銷及行政成本減少14.4%，令毛利率由前的36.6%上升到40.8%。
毛利率料續升
數碼相機營業額3.73億元，升13.2%，佔總營業額61%；相機手機營業額4461萬元，大增1.2倍，佔總營業額由3%增至7%。
雖然原材料價格上漲，但公司提升生產技術有助減省原材料開銷，有信心今年毛利率仍可上升，下半年整體產能可較上半年增加30%至50%，公司會視情況需要再作擴充。
若然順風順水，精熙06年盈利可達2.1億元，每股盈利25.3仙。精熙有「小富士康」稱號，富士康（2038）股價已由高位21元大幅回落到14元，預測PE20倍，精熙以保守的12倍計，股價有機會重上3元水平。
資本策略（497）又成功出招，以7.8億元「必」到灣仔國衞中心50.5%權益，成為大業主，業權包括外牆廣告位置、所有商舖、約10萬平方呎的寫字樓及89個車位。資策同雷曼兄弟基金拍住上之後，喺地產市場表現愈來愈活躍。
購入新廈後，公司擁有同管理的商業大廈樓面超過75萬方呎，保守估計每股賬面資產值約2.40元，現時股價折讓達35%。
郭兆誠